2 कोटी 36 लाखांचा दंड
महसूल,पाटबंधारे विभागाची नोटीस
। सुधागड -पाली । वार्ताहर ।
सुधागड तालुक्यातील ढोकशेत धरण क्षेत्रात एका खाजगी विकसकाने अनधिकृत उत्खनन व बांधकाम केले आहे. या बरोबरच धरणामध्ये भराव देखील केला आहे. यामुळे धरणातील पाणी जाण्याचा मार्ग देखील बंद झाला आहे. यासंदर्भात सुधागड पाली महसूल विभागाने विकासकावर 2 कोटी 36 लाख 64 हजार 620 रुपयांचा दंड ठोठावला आहे. तर पाटबंधारे विभागाने देखील धरणात केलेला भराव काढण्यासाठी नोटीस बजावली आहे.
धरण क्षेत्रातील अनधिकृत उत्खनन, भराव व बांधकामाविषयी सामाजिक कार्यकर्ते सागर मिसाळ यांनी सुधागड महसूल विभाग व पाटबंधारे विभाग कोलाड येथे तक्रार दाखल केली आहे. त्यानुसार ही कारवाई झाली आहे. सागर मिसाळ यांनी याबाबत निवेदन सादर केलेले आहे.तक्रारी निवेदनात म्हटले आहे की ढोकशेत गट सर्व्हे नंबर 432 मध्ये शेत घर बांधण्याचे काम सुरू असून सपाटीकरणाच्या नावाखाली अनधिकृत उत्खनन करण्यात आले आहे. ही जागा ढोकशेत धरणाला लागून असल्याने ढोकशेत धरणामध्ये अनधिकृतरित्या भराव करण्यात आला आहे.
तसेच धरणामधून बाहेर जाणार पाण्याचा प्रवाह देखील मातीचा भराव करून बुजवण्यात आला आहे व कच्चा मार्ग करण्यात आला आहे. ही जागा पाटबंधारे विभाग यांच्या अधिकाराखाली असतांना तेथे अशा प्रकारे अनधिकृत भराव होत असूनही पाटबंधारे विभागाचे दुर्लक्ष होत आहे. असे निवेदनात म्हटले आहे.याबाबत वरिष्ठ अधिकार्यांकडून स्थळ पाहणी करण्यात यावी असे म्हटले आहे. तसेच काही ठिकाणी वृक्ष तोड झाल्याने वन विभागाने देखील येथे लक्ष द्यावे. या अनधिकृत उत्खलनासाठी महसूल विभागाने जवळपास 2 कोटी 36 लाख रुपये दंडाची नोटीस पाठवली आहे. मात्र सुधागड महसूल विभागाच्या माध्यमातून किती दंड वसुली झाली याचीही चौकशी व तपासणी करण्याची विनंती निवेदनात केली आहे.
ढोकशेत येथे एका विकासकाने महसूल विभागाची कोणतीच परवानगी न घेता अनधिकृतरित्या उत्खनन व भरावाचे काम केले आहे. या ठिकाणी तलाठी व मंडळ अधिकारी यांच्यासोबत प्रत्यक्ष जाऊन पाहणी केले. याबाबत सुधागड महसूल विभागाने त्यांना 2 कोटी 36 लाख 64 हजार 620 रुपये दंड ठोठावला आहे. -दिलीप रायण्णावार, तहसीलदार, पाली-सुधागड