14 वर्षांखालील मुलांची क्रिकेट स्पर्धा

रायगडचा सुपर लीगमध्ये प्रवेश
। अलिबाग । विशेष प्रतिनिधी ।
नाशिक येथे सुरू असलेल्या महाराष्ट्र क्रिकेट असोसिएशनच्या 14 वर्षां खलील मुलांच्या क्रिकेट स्पर्धेत रयागडने गटात अव्वल स्थान मिळवून सुपर लीगमध्ये प्रवेश केला.
या स्पर्धेत रायगडचा शेवटचा साखळी सामना औरंगाबाद विरुद्ध होता . या सामन्याच्या निकालावर सुपर लीगमध्ये प्रवेश कोण करणार हे ठरणार होते. औरंगाबाद विरुद्ध गोल्फ क्लब मैदानावर खेळलागेलेल्या सामन्यात औरंगाबादने पहिल्या डावात 242 धावा केल्या. रयागडने आपल्या पहिल्या डावात 9 गाडी गमावून 253 धावा केल्या. पहिल्या डावातील आघाडीच्या जोरावर विजय मिळवून रायगड संघाने गटात अव्वल स्थान मिळवून सुपर लीगमध्ये प्रवेश केला.
औरंगाबाद संघाने नाणेफेक जिंकून प्रथम फलंदाजी करण्याचा निर्णय घेतला. त्यांच्या संघाने 71.2 षटकांमध्ये 242 धावा केल्या. औरंगाबाद संघाचा आरेझ खान याने 87 चेंडूत 67 धावा केल्या. रायगडच्या अमय भोसले याने 17.2 षटकांत 60 धावा देऊन पाच बळी घेतले. रायगड संघाची सुरुवात खराब झाली धावफलक 23 धावात 2 बळी असे दर्शवत असताना संघनायक ओम म्हात्रे 135 चेंडूत 58 धावा व निर्जल पाटील 88 चेंडूत 31 धावा या दोघांनी मिळून तिसर्‍या गड्या करता 168 चेंडूत 80 धावांची भागीदारी केली. त्यानंतर हे दोघेही फलंदाज पाठोपाठ बाद झाल्याने रायगडचा धावफलक 2 बाद 103 वरून चार बाद 107 असा झाला. स्मित पाटील व पार्थ पवार यांनी 183 चेंडूत 86 धावांची भागीदारी करून पहिल्या डावातील आघाडीचे उद्दिष्ट दृष्टिपथात आणले. यामध्ये पार्थ पवार याने 101 चेंडूत 37 धावा केल्या. स्मित पाटील याने उर्वरित फलंदाजांबरोबर 31 व 27 धावांच्या दोन छोट्या-छोट्या भागीदार्‍या करून पहिल्या डावात आघाडी प्राप्त केली. स्मित पाटील 130 चेंडूत 81 धावा काढून नाबाद राहिला. रायगड संघाने 90 षटकात 9 बाद 253 धावा केल्या व 11 धावांची पहिल्या डावात आघाडी घेतली. अशाप्रकारे रायगड संघाने आपल्या गटामध्ये अव्वल स्थान प्राप्त केले व सुपर लीग स्पर्धेकरता देखील पात्रता मिळवुन इतिहास घडवला.
हिंगोली , नाशिक,ब औरंगाबाद विरुद्धच्या सामन्यांमध्ये द्रुतगती गोलंदाज अमेय पाटील 18 बळी साईराज जोशी 9 बळी, फिरकी गोलंदाज शौर्य गायकवाड 7 बळी, अमय भोसले 5 बळी व ओम म्हात्रे चार बळी. फलंदाजांमध्ये क्रिश भाइरा 151धावा, स्मित पाटील 119 धाव, ओम म्हात्रे 109 धावा, यष्टीरक्षक पार्थ पवार 70 धावा यांनी दमदार कामगिरी केली.
रायगड जिल्हा क्रिकेट असोसिएशनचे चे अध्यक्ष चंद्रकांत मते यांनी संघाचे व्यवस्थापक कम प्रशिक्षक जॉन्टी गिलबिले, निवड समिती सदस्य सुमित झुंझारराव, विनेश ठाकूर,अजित म्हात्रे या सर्वांचे विशेष कौतुक केले. तर ायगड जिल्हा क्रिकेट असोसिएशनच्या सर्व सभासदांनी रायगड संघाचे अभिनंदन केले आहे. भविष्यात या सर्व मुलांवर लक्ष देण्यात येईल,असे असोसिएशन चे अध्यक्ष चंद्रकांत मते यांनी सांगितले.