अज्ञात वाहनाची दुचाकीला धडक; दोघांचा मृत्यू

। पुणे । प्रतिनिधी ।

आळंदी-पंढरपूर राष्ट्रीय महामार्गावर दौंडजजवळ भीषण अपघात झाला. अज्ञात वाहनाने दुचाकीला धडक दिली. या अपघातात दुचाकीवरील दोघा तरुणांचा जागीच मृत्यू झाला. अपघातानंतर अज्ञात वाहनचालक गाडीसह घटनास्थळावरून पसार झाला.

हा अपघात आळंदी-पंढरपूर राष्ट्रीय पालखी महामार्गावर दौंडजजवळ झाला. रविवारी (दि.23) दुपारी चार वाजण्याच्या सुमारास अमोल विठ्ठल दगडे (वय 38, मूळ गाव दौंडज सध्या रा.मावडी क.प, ता. पुरंदर) व दिग्विजय यशवंत कोलते (वय 34 रा.पिसर्वे, ता.पुरंदर) हे दोघे जण दुचाकीवरून दौंडजहून जेजुरीकडे येत होते. त्याचवेळी समोरून येणारे अज्ञात वाहन व दुचाकी गाडी यांची समोरासमोर धडक झाली. या अपघातात दुचाकीवरील दोघांचा जागीच मृत्यू झाला. अपघातानंतर अज्ञात गाडीचालक घटनास्थळी न थांबता गाडीसह पसार झाला. याप्रकरणी जेजुरी पोलीस ठाण्याचे सहाय्यक पोलिस निरीक्षक दिपक वाकचौरे अधिक तपास करीत आहेत.