…अखेर नगरविकास मंत्री एकनाथ शिंदे उतरले रस्त्यावर

महाडच्या स्वच्छतेसाठी विविध महापालिकेच्या सहकार्याने शहराच्या स्वच्छतेला सुरुवात

। महाड । वार्ताहर ।

गेल्या आठवड्यात मुसळधार पावसामुळे पुराचा तडाखा बसलेल्या महाड शहराच्या स्वच्छतेसाठी नगरविकास मंत्री एकनाथ शिंदे रस्त्यावर उतरले. ठाण्यासह विविध महापालिकेचे कर्मचार्‍यांनी आवश्यक साधनसामुग्रीच्या मदतीने शविवारी मोठ्या प्रमाणात स्वच्छतेला सुरूवात केली. नगरविकास मंत्री या नात्याने शिंदे यांनी विविध महापालिकेच्या माध्यमातून आवश्यक मनुष्यबळ व यंत्रसामुग्रीची जमवाजमव करून शनिवारी सकाळी महाड गाठले.

स्थानिक प्रशासनाच्या मदतीने शहराची चार भागात विभागणी केली आणि घरोघरी कर्मचारी पाठवून साफसफाईच्या कामाला सुरुवात केली. या सर्व कामावर भरपावसात फिरून शिंदे स्वतः लक्ष ठेवून होते. त्याचबरोबर शहराला स्वच्छतेसाठी वाढीव दीड कोटी रुपये देण्याची घोषणाही त्यांनी केली. यापूर्वीच पन्नास लाखांची मदत जाहीर केली होती; मात्र झालेले नुकसान पाहता ती पुरेशी नसल्याचे निदर्शनास आल्याने वाढीव दीड कोटी रुपये देण्याचा निर्णय त्यांनी जाहीर केला.

कोकणात झालेल्या मुसळधार पावसाचा मोठा फटका महाड, चिपळूण, खेड या शहराला बसला. अनेक बाजारपेठांमध्ये वीस फुटांपर्यंत पाणी शिरले. ठाणे महापालिकेचे 150, नवी मुंबई महापालिकेचे 120, पनवेल महापालिकेचे 100 सफाई कर्मचारी व टीडीआरफ पथकाचे 30 जवान असे मनुष्यबळ या स्वच्छता कामासाठी तैनात करण्यात आले आहेत. याशिवाय ठाणे महापालिकेने पाठविलेले ड्रेनेज लाईन स्वच्छ करणारे टँकर्स, 20 जेसीबी, 20 डंपर, 5 घंटागाड्या, जेटिंग मशिन्स, 3 फायर टँकर्स तसेच मशिन, ठाणे व खोपोलीवरून घरे स्वच्छ करण्यासाठी स्प्रेईंग मशीन, रोगराई पसरु नये यासाठी आणि धूर फवारणी करणारी फॅनिंग मशीन आदी साहित्यांचा समावेश आहे.

शनिवारी सकाळी 9 वाजता आशिष शिंदे यांनी जिल्हा मदत केंद्रात परिस्थितीचा आढावा घेऊन प्रत्येकाला जबाबदारी नेमून दिली. महाड शहरात पूर ओसरल्यानंतर 15 लेप्टोचे रुग्ण आढळले आहेत. ही साथ वाढू नये तसेच रोगही शहरात पसरु नये, यासाठी आपण स्वत:च या स्वच्छता कामासाठी पुढाकार घेतला असून सर्व यंत्रणा कार्यरत केली असल्याचे शिंदे यांनी सांगितले. पुढील चार ते पाच दिवसांत संपूर्ण महाड स्वच्छ करण्याचा निर्धार असल्याचेही त्यांनी स्पष्ट केले. यावेळी माजी आमदार भरत गोगावले ठाण्याचे महापौर नरेश म्हस्के, ठाणे महापालिकेचे अतिरिक्त आयुक्त संदीप माळी, उपायुक्त अशोक बुरपल्ले, अतिरिक्त जिल्हाधिकारी अमोल यादव, महाड शहराचे मुख्याधिकारी जीवन पाटील आणि इतर अधिकारी, पदाधिकारी उपस्थित होते.