‘ग्रीन पोर्ट’साठी जेएनपीटीकडून इलेक्ट्रिक वाहनांचा वापर

ई-वाहनांचा वापर करणारे देशातील पहिले बंदर
| उरण | वार्ताहर |
जवाहरलाल नेहरू पोर्ट ट्रस्ट (जेएनपीटी) हे भारतातील कंटेनर हाताळणी करणारे एक प्रमुख बंदर आहे. सुरवातीपासूनच जेएनपीटी आपल्या प्रचालन क्षेत्रामध्ये शाश्‍वत विकास कार्यासाठी प्रयत्न करीत आहे. ग्रीन पोर्ट (हरित बंदर) उपक्रमांतर्गत व शाश्‍वत विकासाची उद्दिष्टे साध्य करण्याच्या दृष्टीकोनातून जेएनपीटीने आपल्या प्रचालन क्षेत्रामध्ये नऊ इलेक्ट्रिक वाहनांचा वापर सुरू केला आहे.
या वाहनांचा वापर मुख्यत: बंदराच्या प्रचालन क्षेत्रामध्ये कामगारांना एका ठिकाणाहून दुसर्‍या ठिकाणी प्रवास करण्यासाठी केला जाणार आहे. जेएनपीटीचे अध्यक्ष संजय सेठी यांच्या हस्ते इलेक्ट्रिक वाहनांचे उद्घाटन करण्यात आले. यावेळी जेएनपीटीचे उपाध्यक्ष उन्मेष वाघ व सर्व विभागाध्यक्ष उपस्थित होते.

विद्युत वाहनांचा वापर हे जेएनपीटीच्या ‘ग्रीन पोर्ट’ उपक्रमाशी सुसंगत असून जेएनपीटीने आपल्या कर्मचार्‍यांसाठी एक पर्यावरण अनुकूल वाहतूक पर्याय उपलब्ध करून दिला आहे. यामुळे बंदराच्या शाश्‍वत व हरित उपक्रमांच्या यादीमध्ये आणखी एका उपक्रमाची भर पडली आहे. ई-वाहने ही शून्य-उत्सर्जन वाहने असल्याने यांच्या वापारामुळे जेएनपीटी हरित व ऊर्जा-कार्यक्षम वाहतुक पर्याय निर्माण करण्यास सक्षम बनेल. जेएनपीटीने या नवीन ई-वाहनांसाठी एक डेडिकेटेड चार्जिंग स्टेशनदेखील कार्यान्वित केले आहे.

केवळ आर्थिकदृष्ट्या संपन्न होणे हे आमचे उद्दिष्ट नसून, पर्यावरणीय आणि सामाजिक स्थिरता प्राप्त करणे हेदेखील आमचे मुख्य उद्दिष्ट आहे. अशाप्रकारे भविष्यातदेखील पर्यावरण संरक्षण हा जेएनपीटीच्या नियोजन व कामकाजाचा एक अविभाज्य घटक – संजय सेठी, अध्यक्ष, जेएनपीटी