पोलिओमुक्त रायगडसाठी लसीकरण मोहीम

पावणे दोन लाख जणांना पोलिओ लस

| रायगड | जिल्हा प्रतिनिधी |

रायगड जिल्ह्यामध्ये राष्ट्रीय पल्स पोलिओ लसीकरण मोहिम राबविण्यात येणार आहे. या अनुषंगाने प्रशासनाने हालचाल सुरु केली आहे. जिल्ह्यामध्ये रविवारी (दि.28) पोलिओ लसीकरण मोहीम घेण्यात येणार आहे. या मोहिमेद्वारे जिल्ह्यातील 0 ते 5 वर्षे वयोगटातील 1 लाख 89 हजार 27 बालकांना पोलिओ प्रतिबंधक लस देण्यात येणार आहे. यावेळी एकही बालक लसीकरणापासून वंचित राहणार नाही, याची दक्षता घेण्याच्या सूचना जिल्हा प्रशासनाकडून देण्यात आल्या आहेत. पोलिओमुळे कायमचे अपंगत्व येते. त्यामुळे पोलिओ मुक्त रायगडसाठी जिल्हा प्रशासनने कंबर कसली आहे. याबाबत जिल्हा स्तरावर उपजिल्हाधिकारी रविंद्र शेळके यांच्या प्रमुख उपस्थितीत बैठक आयोजित करण्यात आली. यावेळी त्यांनी या मोहिमेबद्दल माहिती दिली.

जिल्ह्यात दि.28 जून रोजी पोलिओ लसीकरण मोहीम राबविण्यात येणार आहे. यावेळी जिल्हाभरात 2 हजार 341 लसीकरण केंद्र उभारण्यात येणार आहेत. प्राथमिक आरोग्य केंद्रे, उपकेंद्रे, ग्रामीण रुग्णालये, शहरी आरोग्य केंद्रे, अंगणवाडी केंद्रे तसेच इतर निश्चित ठिकाणी सकाळी 8.00 ते सायंकाळी 5.00 या वेळेत लसीकरणाची सुविधा उपलब्ध असणार आहे. स्थलांतरित कुटुंबे, बांधकाम कामगारांची वस्ती, वीटभट्ट्या, बसस्थानके, रेल्वे स्थानके तसेच दुर्गम भागांमध्ये विशेष पथकांद्वारे लसीकरणाची व्यवस्था करण्यात आली आहे. दरम्यान, 0 ते 5 वर्षे वयोगटातील प्रत्येक बालकाला जवळच्या पल्स पोलिओ बूथवर घेऊन जाऊन पोलिओ प्रतिबंधक लसीचे दोन थेंब पाजावेत आणि पोलिओमुक्त रायगड घडविण्यास सहकार्य करावे, असे आवाहन करण्यात आले आहे. कोणताही बालक लसीकरणापासून वंचित राहू नये, यासाठी नियोजन कऱण्याच्या सुचना संबंधित विभागाला देण्यात आल्या आहेत. नियमित लसीकरण झालेले असले तरी प्रत्येक बालकाला पल्स पोलिओ लसीचे दोन थेंब देणे आवश्यक आहे. मोहिमेच्या पहिल्या दिवशी केंद्रावर लसीकरण केल्यानंतर पुढील टप्प्यात आशा स्वयंसेविका, आरोग्य कर्मचारी आणि अंगणवाडी सेविका घरभेटी देऊन लसीकरणापासून वंचित राहिलेल्या बालकांचा शोध घेऊन त्यांना लस दिली जाणार असल्याची महिती देण्यात आली आहे.