नटसम्राट हरपला! ज्येष्ठ अभिनेते नाना पाटेकर अनंतात विलीन

नानाची वाडीत शासकीय इतमामात अंत्यसंस्कार

|मुंबई | प्रतिनिधी |

पडद्यावरच्या भूमिकांना जिवंत करणारा आवाज आज कायमचा शांत झाला. आपल्या दमदार अभिनयाने, धारदार संवादफेकीने आणि अस्सल व्यक्तिमत्त्वाने मराठी-हिंदी चित्रपटसृष्टीवर स्वतंत्र ठसा उमटवणारे ज्येष्ठ अभिनेते नाना पाटेकर यांचे गुरुवारी (दि.8) वयाच्या 75व्या वर्षी हृदयविकाराच्या झटक्याने निधन झाले. गोव्यातील निवासस्थानी प्रकृती बिघडल्यानंतर त्यांना रुग्णालयात दाखल करण्यात आले; मात्र उपचारादरम्यान त्यांना मृत घोषित करण्यात आले. त्यांच्या निधनाने संपूर्ण चित्रपटसृष्टीवर शोककळा पसरली आहे. नानांच्या पार्थिवावर पुण्यातील डोणजे येथील त्यांच्या नानाची वाडी फार्महाऊसवर  शासकीय इतमामात अंत्यसंस्कार करण्यात आले.

ज्येष्ठ अभिनेते नाना पाटेकर यांच्या निधनाच्या वृत्ताने चित्रपटसृष्टीसह त्यांच्या चाहत्यांना मोठा धक्का बसला आहे. त्यांना गंभीर कार्डियाक अरेस्ट आला होता. गोव्यातील डोना पाउला येथील निवासस्थानी ते बेशुद्ध अवस्थेत आढळले. त्यानंतर त्यांना मणिपाल रुग्णालयात दाखल करण्यात आले. डॉक्टरांनी सुमारे 45 मिनिटे सीपीआर देऊन त्यांना वाचवण्याचा प्रयत्न केला. मात्र, उपचारांना प्रतिसाद मिळाला नाही. त्यांना पहाटे 5.20 वाजता मृत घोषित करण्यात आले.

नाना पाटेकर हे केवळ अभिनेते नव्हते, तर अभिनयाची स्वतंत्र शैली निर्माण करणारे कलावंत होते. रंगभूमीपासून मराठी आणि हिंदी चित्रपटसृष्टीपर्यंत त्यांनी साकारलेल्या असंख्य भूमिका रसिकांच्या मनात कायमच्या कोरल्या गेल्या. ‌‘क्रांतिवीर‌’, ‌‘परिंदा‌’, ‌‘अग्निसाक्षी‌’, ‌‘अब तक छप्पन‌’, ‌‘वेलकम‌’ आणि ‌‘नटसम्राट‌’ यांसारख्या चित्रपटांमधून त्यांच्या अभिनयाचे विविध पैलू समोर आले.

.
तीन वेळा राष्ट्रीय चित्रपट पुरस्काराने गौरवलेल्या नाना पाटेकर यांनी अभिनयासोबतच सामाजिक कार्यातही महत्त्वपूर्ण योगदान दिले. नाम फाऊंडेशनच्या माध्यमातून त्यांनी शेतकरी आणि दुष्काळग्रस्तांसाठी काम केले. त्यांच्या निधनाने मराठी रंगभूमी, हिंदी-मराठी चित्रपटसृष्टी आणि सामाजिक क्षेत्रात मोठी पोकळी निर्माण झाली आहे.