पुणे-सातारा महामार्गावर बसला भीषण आग

। पुणे । प्रतिनिधी ।

पुणे-सातारा महामार्गावर वोल्वो बसला भीषण आग लागली. ही घटना गुरुवारी (दि. 17) दुपारच्या सुमारास घडली. आगीत बस संपूर्ण जळून खाक झाली आहे. सुदैवाने दुर्घटनेत कोणतीही जीवितहानी झाली नाही. बसचालकाच्या सतर्कतेमुळे प्रवासी सुखरुप बचावले आहेत.

खासगी वोल्वो बस कोल्हापूरहून पुण्याकडे येत होती. यादरम्यान खेड शिवापूरजवळ बसच्या इंजिनमधून अचानक धूर येऊ लागला. बघता बघता क्षणात बसने पेट घेतला. जीव वाचवण्यासाठी प्रवाशांनी बसमधून उड्या घेतल्या. चालकाने तात्काळ बस थांबवल्याने सुदैवाने यात कोणतीही जीवितहानी झाली नाही. मात्र, काहीजण किरकोळ जखमी झाले आहेत. यावेळी बसमधून जवळपास 20 ते 25 प्रवासी प्रवास करत होते.

घटनेची माहिती मिळताच अग्निशमन दलाने तात्काळ घटनास्थळी धाव घेतली. मात्र, आगीची तीव्रता जास्त असल्यामुळे दल येण्यापूर्वीच बस जळून खाक झाली होती. अथक प्रयत्नाने अग्निशमन दलाने आगीवर नियंत्रण मिळवले. बसला आग नेमकी कशामुळे लागली याचे कारण अद्याप स्पष्ट झाले नसून याबाबत स्थानिक पोलीस आणि बस कंपनी अधिक तपास करत आहेत. तसेच, या घटनेमुळे महामार्गावरील वाहतूक काही काळ विस्कळीत झाली होती.