| उरण | वार्ताहर |
उरण तालुक्यातील रानसई ग्रामपंचायत हद्दीतील सहा आदिवासी वाड्यांना आणि चिरनेर ग्रामपंचायत हद्दीतील दोन आदिवासी वाड्यांना पाणीपुरवठा करणार्‍या विहिरीनी तळ गाठल्याने आदिवासी बांधवांना भीषण पाणीटंचाईचा सामना करावा लागत आहे. त्यामुळे या दोन ग्रामपंचायत हद्दीतील आदिवासी बांधवांना भेडसावणारी पाण्याची समस्या दूर करण्यासाठी टँकरने पाणीपुरवठा करण्याचा निर्णय उरण पंचायत समितीचे गटविकास अधिकारी समिर वाठारकर यांनी घेतला आहे.
उरण तालुक्यातील जनतेला पाणी पुरवठा करणार्‍या रानसई व पुनाडे धरणाच्या पाणलोट क्षेत्रातील पाण्याची पातळी खालावली आहे. त्यामुळे तालुक्यातील अनेक गावांमधील रहिवाशांना गढूळ पाणी पुरवठा होत असल्याची ओरड रहिवाशांकडून ऐकण्यास मिळत आहे. त्यातच रानसई धरणाच्या डोंगर कुशीत वसलेल्या रानसई ग्रामपंचायत हद्दीतील सहा आदिवासी वाड्यांना व चिरनेर ग्रामपंचायत हद्दीतील चांदायणी व केळाचामाळ या दोन आदिवासी वाड्यांना पाणीपुरवठा करणार्‍या विहिरीनी तळ गाठल्याने दोन्ही ग्रामपंचायत हद्दीतील रहिवाशांना भीषण पाणीटंचाईचा सामना करावा लागत आहे. त्यामुळे आदिवासी बांधवांना भेडसावणारी पाण्याची समस्या दूर करण्यासाठी टँकरने पाणीपुरवठा करण्यात यावा, अशी मागणी आदिवासी बांधवांनी केली आहे.
उरण तालुक्यातील रानसई ग्रामपंचायत व चिरनेर ग्रामपंचायत हद्दीतील दोन आदिवासी वाड्यांवरील रहिवाशांना पाणीटंचाईचा सामना करावा लागत आहे. त्यामुळे या आदिवासी वाड्यावरील पाण्याची समस्या दूर करण्यासाठी सध्या टँकरने पाणीपुरवठा करण्याचा निर्णय उरण पंचायत समितीच्या माध्यमातून घेण्यात आला आहे.
समीर वाठारकर
गटविकास अधिकारी उरण पंचायत समिती