। कर्जत । प्रतिनिधी ।
शिक्षकांची जुनी पेंशन योजना, भविष्य निर्वाह निधी संदर्भातील प्रश्न मार्गी लावण्यात येतील, कोणतेही पक्षभेद न करता ज्या-ज्या शाळांना समस्या आहेत किंवा त्यांचे प्रश्न आहेत ते लवकरच सोडविण्यात येतील असा शब्द कोकण विभाग शिक्षक मतदार संघाचे आ.बाळाराम पाटील यांनी कर्जतमध्ये दिला. कर्जत तालुक्यातील शिक्षक आणि शाळांच्या समस्या जाणून घेण्यासाठी चिंचवली-डिकसळ येथील भाऊसाहेब राऊत विद्यालय सभागृहात आ.बाळाराम पाटील यांनी बैठक घेतील. यावेळी शेकाप जिल्हा खजिनदार तसेच प्रभारी कर्जत तालुका चिटणीस राम राणे, ज्येष्ठ नेते विलास थोरवे, विद्या प्रसारक मंडळाचे खजिनदार राहुल तिटकारे, वैशाली तिटकारे, विद्याप्रसारक मंडळ सदस्य सुरेश सावंत, मध्यवर्ती शेकाप सदस्य आकाश निर्मळ, कृषी उत्पन्न बाजार समिती सदस्य रविंद्र झांजे, वैभव भगत, जिल्हा समन्वयक बबन म्हात्रे, तसेच विविध शाळांचे मुख्याध्यापक, शिक्षक उपस्थित होते. आमदार पाटील यांनी कर्जत तालुक्यातील ग्रामीण भागातील शाळांना आजपर्यंत वाटप केलेला निधी आणि साधने याची माहिती दिली. यावेळी तालुका कार्यकारीणीची निवड करण्यात आली. कार्यक्रमाचे सूत्रसंचालन श्रीकांत हावरे यांनी केले. प्रास्ताविक बबन म्हात्रे यांनी केले तर आभार मुख्याध्यापक पी.डी.वाखारकर यांनी मानले.