| पनवेल | वार्ताहर |
सायन-पनवेल मार्गालगत खांदा कॉलनी येथे असलेल्या शिवमंदिरातून दर्शन घेऊन घरी परतणार्या महिलेचा भरधाव दुचाकीने धडक दिल्याने झालेल्या अपघातात मृत्यू झाल्याची घटना घडली. कामोठे पोलिसांनी या अपघाताला जबाबदार असलेल्या दुचाकी चालकाविरोधात गुन्हा दाखल करुन त्याला ताब्यात घेतले आहे. या अपघातातील मृत महिलेचे नाव धिरज बलेन्दर सिंग (50) असे असून त्या कामोठे, सेक्टर-24 मधील बाल गणेश सोसायटीत कुटुंबासह राहत होत्या. सायंकाळी त्या इतर महिलांसोबत सायन पनवेल मार्गालगत खांदा कॉलनी येथे असलेल्या शिवमंदिरात दर्शनासाठी गेल्या होत्या. दर्शन घेऊन त्या इतर महिलांसह परतत होत्या. यावेळी महामार्गावरील नेत्रज्योत हॉस्पीटल समोरुन रस्ता ओलांडून कामोठे, सेक्टर-1 येथे परतत असताना, पनवेलहुन तुर्भे येथे जाणार्या भरधाव दुचाकीने धिरज सिंग यांना धडक दिली. यात धिरज सिंग या गंभीर जखमी झाल्याने त्यांना रुग्णालयात दाखल करण्यात आले. मात्र, उपचारादरम्यान रात्री त्यांचा मृत्यू झाला. या अपघातानंतर कामोठे पोलिसांनी धिरज सिंग यांना धडक देणारा दुचाकी चालक याच्या विरोधात गुन्हा दाखल केला आहे.