धावत्या एसटीतून महिलेची उडी

रोहा-चणेरा मार्गावर धक्कादायक प्रकार

| अलिबाग | प्रतिनिधी |

प्रवाशांच्या सुरक्षिततेची जबाबदारी असलेल्या एसटी बसमध्येच एका 38 वर्षीय महिलेला भीतीपोटी धावत्या बसमधून उडी मारावी लागल्याची संतापजनक आणि धक्कादायक घटना रोहा बस आगाराच्या चणेरा-रोहा मार्गावर घडली. महादेवखार येथे उतरायचे असूनही वारंवार सांगून, बेल देऊनही बस न थांबवल्याने घाबरलेल्या महिलेने अखेर दरवाजा उघडून उडी मारली. सुदैवाने मोठी जीवितहानी टळली, मात्र या प्रकारामुळे एसटी प्रशासनाच्या बेफिकीरीवर प्रश्नचिन्ह उभे राहिले आहे.

बुधवार, दि. 11 फेब्रुवारी रोजी सायंकाळी सुमारे 7 वाजता चणेरावरून सुटलेल्या रोहा आगाराच्या एसटी बसमध्ये सदर महिला महादेवखार येथे जाण्यासाठी चढली होती. तिने कंडक्टरकडून महादेवखारचे तिकीटही काढले होते. बसमध्ये त्या वेळी चालक, वाहक आणि ही महिला एवढेच प्रवासी असल्याचे तिने तक्रारीत नमूद केले आहे. बस सुटल्यानंतर बसमधील लाईट बंद करण्यात आल्याचा आरोपही महिलेने केला आहे.

महादेवखार जवळ आल्याचे लक्षात येताच महिलेने कंडक्टरला बस थांबवण्यास सांगितले आणि बेल मारण्याची विनंती केली. चालकाला देखील तिने बस थांबवण्यास सांगितले. एकदा-दोनदा नव्हे तर, चार वेळा विनंती करूनही चालक-वाहकांनी त्याकडे दुर्लक्ष केल्याचा महिलेचा आरोप आहे. बसमध्ये ती एकटीच प्रवासी असल्याने तिच्या मनात भीती निर्माण झाली. महादेवखार बसथांबा येताच चढणीवर बसचा वेग कमी झाल्याचा अंदाज घेत, चालक-वाहक बोलण्यात गुंग असल्याचा फायदा घेऊन महिलेने दरवाजा उघडला आणि धावत्या बसमधून उडी मारली. या प्रकारात तिच्या हातापायाला मुका मार लागला, मात्र मोठी दुखापत टळली. धक्कादायक म्हणजे, महिला उडी मारल्यानंतरही बस थांबवण्यात आली नसल्याचा आरोप महिलेने केला आहे.

घाबरलेल्या अवस्थेत महिलेने आणि तिच्या पतीने रोहा पोलीस ठाण्यात संबंधित एसटी चालक व वाहकाविरोधात तक्रार दाखल केली. या तक्रारीनंतर रोहा पोलीस ठाण्याचे पोलीस निरीक्षक मारुती पाटील यांनी गुरुवार, दि. 12 फेब्रुवारी रोजी रोहा आगाराचे अधिकारी तसेच संबंधित चालक-वाहकांना पोलीस ठाण्यात बोलावून जाब विचारला.

पोलिसांच्या मध्यस्थीने दोन्ही बाजू समोरासमोर आल्यावर हा प्रकार गैरसमजातून झाल्याचे सांगण्यात आले. चालक आणि वाहकांनी झालेल्या प्रकाराबद्दल माफी मागितली. तसेच या चालक-वाहकांना यापुढे या मार्गावर पाठवले जाणार नसल्याचे आश्वासन आगार अधिकाऱ्यांनी दिल्याचे समजते. अखेर हे प्रकरण पोलिसांच्या हस्तक्षेपाने मिटवण्यात आले.

ही घटना पूर्णपणे गैरसमजातून घडली असून, यामागे कोणताही वाईट हेतू नव्हता. एसटी बसला निश्चित केलेल्या स्टेजप्रमाणे थांबवले जाते. बस न थांबवण्यामागे कोणतेही कारण नव्हते. प्रवाशांनी गैरसमज करून घेऊ नये. चालक आणि वाहकांना समज देण्यात आली असून, यापुढे असा प्रकार होणार नाही याची काळजी घेतली जाईल.

-श्री.शेलार,
आगारप्रमुख, रोहा

पीडित महिलेने तक्रार अर्ज दिल्यानंतर आगाराचे अधिकारी तसेच संबंधित चालक-वाहकांना पोलीस ठाण्यात बोलावण्यात आले होते. पीडित महिला व तिचे पतीही उपस्थित होते. हा प्रकार गैरसमजातून झाल्याचे स्पष्ट झाले. चालक-वाहकांनी माफी मागितली असून, यापुढे अशी घटना घडणार नाही, असे त्यांनी आश्वासन दिले आहे.

-मारुती पाटील,
पोलीस निरीक्षक, रोहा