घरगुती वादातून महिलेची हत्या

। पनवेल । वार्ताहर ।

घरगुती वादातून लाकडी दांडक्याने आणि हत्याराने डोक्यावर मारहाण करून 45 वर्षीय महिलेची हत्या केल्याची धक्कादायक घटना पनवेलमध्ये घडली आहे. याप्रकरणी आरोपी कमळ्या राघो निरगुडा (वय 55, राहणार टावरवाडी, पनवेल) याच्या विरोधात पनवेल तालुका पोलीस ठाण्यात हत्येचा गुन्हा दाखल करण्यात आला आहे.

पोलिसांनी दिलेल्या माहितीनुसार, घटनेतील मृत महिला शनिवारी गोमा निरगुडा (45) व आरोपी हे दोघे एकत्र राहत होते. आरोपीला दारूचे व्यसन असल्याने तो शनिवारी निरगुडा यांना दारू पिऊन मारहाण करत असे. मंगळवारी (दि. 22) आरोपीने मृत महिला शनिवारी हिला लाकडी दांडक्याने आणि हत्याराने मारहाण केली. यात ती गंभीर जखमी झाल्याने तिचा मृत्यू झाला. याप्रकरणी आरोपी विरोधात पनवेल तालुका पोलीस ठाण्यात हत्येचा गुन्हा दाखल करण्यात आला असून पोलिसांनी आरोपी कमळया निरगुडा याला अटक केली आहे.