अधिकाऱ्याविरोधात गुन्हा दाखल
| अलिबाग | प्रतिनिधी |
नागोठणे परिसरातील रिलायन्स कंपनीमधील एका अधिकाऱ्याविरोधात विनयभंगाचा गुन्हा दाखल करण्यात आला आहे. बांधकामाच्या ठेक्याची मुदत वाढवून देण्याच्या आमिषाने महिलेच्या मनात लज्जा उत्पन्न होईल असे कृत्य त्याने केल्याची तक्रार नागोठणे पोलीस ठाण्यात करण्यात आली आहे. या घटनेने जिल्ह्यात खळबळ उडाली आहे.
पोलिसांकडून मिळालेल्या माहितीनुसार, रमेश धनावडे असे या अधिकाऱ्याचे नाव आहे. एका पीडित महिलेच्या नावाने गटार बांधकामाचा ठेका होता. या ठेक्याची मुदत संपली होती. त्यामुळे मुदत वाढवून देण्यासाठी 38 वर्षीय महिला तिच्या महिला नातेवाईकांसोबत कंपनीमध्ये गेली होती. याबाबत धनावडे यांच्या कार्यालयात चर्चा करीत असताना त्यांनी त्या महिलेचा विनयभंग केला. त्यामुळे महिलेच्या मनात लज्जा निर्माण झाली. ही घटना गुरुवारी दुपारी बेणसे येथील रिलायन्स इस्टेट कार्यालयात धनावडे यांच्या केबीनमध्ये घडली. अखेर महिलेने या प्रकाराबाबत नागोठणे पोलीस ठाणे गाठले. याप्रकरणी धनावडे यांच्याविरोधात तक्रार दाखल करण्यात आली असल्याची माहिती पोलिसांनी दिली.