पुढील वर्षी सप्टेंबरपासून होणार सुरू
उरण । वार्ताहर ।
मध्य रेल्वेवरील नेरुळ ते उरण ही उपनगरीय चौथी संपूर्ण मार्गिका सप्टेंबर 2022 पासून प्रवाशांच्या सेवेत येणार आहे. यातील खारकोपर ते उरण या दुसर्या टप्प्यातील कामाला गती दिली जात असून ते अंतिम टप्प्यापर्यंत पोहोचल्याची माहिती एका वरिष्ठ अधिकार्याने दिली.
नेरुळ-बेलापूर-खारकोपर ते उरण उपनगरीय रेल्वे प्रकल्प अनेक वर्षांपासून रखडला आहे. यातील नेरुळ ते बेलापूर, खारकोपर हा पहिला टप्पा नोव्हेंबर 2018 मध्ये प्रवाशांच्या सेवेत आला आहे; परंतु भूसंपादनासह अनेक अडथळ्यांमुळे नेरुळ ते उरण संपूर्ण प्रकल्प रखडला. यातील पहिला टप्पा वेळेत पूर्ण झाला. परंतु खारकोपर ते उरण हा दुसरा टप्पा पूर्ण होण्यासाठी बर्याच अडचणींचा सामना करावा लागला. परिणामी प्रकल्पासाठीचा एकू ण 500 कोटींचा खर्च सुमारे 1700 कोटींपर्यंत पोहोचला.
खारकोपरपुढील उरणपर्यंतच्या रेल्वे मार्गासाठी जमीन संपादनाची समस्या कायम होती. यात सिडकोकडून तीन किलोमीटरची जागा रेल्वेला मिळणे बाकी होती. त्याचे भूसंपादन पार पडले आणि ती जागा रेल्वेला मिळाली. त्यामुळे मोठा अडसर दूर झाला असून उर्वरित दुसर्या टप्प्यातील खारकोपर ते उरण मार्गिकाही पूर्ण करून सप्टेंबर 2022 पासून नेरुळ ते उरण संपूर्ण उपनगरीय मार्गिका प्रवाशांच्या सेवेत येईल, अशी माहिती देण्यात आली.
एकूण 27 किमी लांबीच्या मार्गातील 14.60 किमीचे काम शिल्लक आहे. दुसर्या टप्प्यातील मार्गिके त खारकोपर, गव्हाण, रांजणपाडा, न्हावा शेवा, द्रोणागिरी आणि उरण ही रेल्वे स्थानके आहेत. या प्रकल्पासाठी यंदाच्या अर्थसंकल्पात 20 कोटी रुपयांचा निधीही दिला आहे. मध्य रेल्वेने टाळेबंदीत हा मार्ग पूर्ण करण्यावर भर दिला असून प्रकल्प पूर्ण झाल्यास नेरुळ व उरणवासीयांबरोबरच अन्य प्रवाशांनाही त्याचा बराच फायदा होईल. यामुळे जेएनपीटी आणि येत्या काळात तयार होणारे नवी मुंबई विमानतळही जोडले जाईल.
नेरुळ-उरण रेल्वे मार्गिकेचे काम अंतिम टप्प्यात
![](https://krushival.in/grygrars/2021/10/new-railway-corridor-759-1024x576.jpg)