कामगार स्मृती चषकाला प्रारंभ

। अलिबाग । प्रतिनिधी ।

राष्ट्रीय केमिकल अँड फर्टीलायझर्स (आरसीएफ) लिमिटेड थळ यांच्यातर्फे अलिबाग प्रेस असो.च्या सहकार्याने आयोजित करण्यात आलेल्या कामगार स्मृती चषक जिल्हास्तरीय आदिवासी कबड्डी स्पर्धेला गुरुवारी (दि.1) प्रारंभ झाला आहे. कुरूळ येथील आरसीएफ वसाहतीतील क्रीडासंकुलात ही स्पर्धा खेळविण्यात येत आहे. या स्पर्धेत रायगड जिल्ह्यातील 64 आदिवासी संघांनी सहभाग घेतला आहे.

या स्पर्धेचे उद्घाटन आरसीएफ थळचे कार्यकारी संचालक नितीन हिरडे यांच्या हस्ते करण्यात आले. यावेळी, महाव्यवस्थापक संजीव हरळीकर, सुधीर कोळी, अभय कालबाडे, व्ही. मंगेश, उप महाव्यवस्थापक विनायक पाटील, सर्व संघटनांचे प्रतिनिधी, मानव संसाधनचे अधिकारी, प्रशासनाचे अधिकारी, वरिष्ठ जनसंपर्क अधिकारी डॉ. राकेश कवळे व माजी राष्ट्रीय खेळाडू दिलीप धुमाळ आदी मान्यवर उपस्थित होते.

या स्पर्धेतील विजेत्या संघाला रोख रक्कम रुपये 25 हजार व चषक, उपविजेत्या संघाला रोख रक्कम रुपये 15 हजार व चषक, तर तृतीय व चतुर्थ क्रमांक मिळवणार्‍या संघाला रोख रक्कम रुपये 10 हजार व चषक अशी सांघिक बक्षिसे देण्यात येणार आहेत. त्याचबरोबर स्पर्धेतील सर्वोत्कृष्ट खेळाडू, उत्कृष्ट पकड, उत्कृष्ट चढाई यांच्यासाठी रोख रक्कम व चषक अशी वैयक्ती बक्षिसे देण्यात येणार आहेत.