भीषण! ट्रकची दुचाकीला धडक; तरुणीचा मृत्यू

। नागपूर । प्रतिनिधी ।

कळमना परिसरातील चिखली चौकाकडून भंडारा रोडकडे जाणाऱ्या उड्डानपुलावर ट्रकने दुचाकीला धडक दिली. या अपघातात दुचाकीवरील तरुणीचा मृत्यू झाला तर तिचा मित्र गंभीर जखमी झाला. ही दुर्दैवी घटना बुधवारी (दि. 26) दुपारच्या सुमारास घडली. काजल देशराम भंडारकर (25, चिखली, सडक अर्जूनी, जि. गोंदीया) असे मृत तरुणीचे नाव असून कोमेश चेतराम झोडे (26, सुंदरी-परसोडी, ता. साकोली. जि. भंडारा) असे गंभीर जखमी तरुणाचे नाव आहे.

काजल भंडारकर ही प्रादेशिक मनोरूग्णालयात नोकरीला असून ती नागपूरातच राहते. मात्र, बुधवार सुटीचा दिवस असल्याने तिला घरी जायचे होते. तिचा मित्र कोमेश झोडे हा कामानिमित्त नागपुरात आला होता. काम आटोपल्यानंतर तो गावी जाणार होता. त्याच्यासोबत काजलही घरी जाण्यास निघाली. कोमेश हा दुचाकी चालवत होता तर काजल मागे बसली होती. दरम्यान, कळमना परिसरातील चिखली चौकाकडून भंडारा रोडकडे जाणाऱ्या उड्डानपुलावरून जात असताना काळरुपी ट्रकचालकाने दुचाकीला मागून धडक दिली आणि पळून गेला. या अपघातात दोघेही गंभीर जखमी झाले. काजलचे डोके दुभाजकाला आदळल्यामुळे तिला गंभीर दुखापत झाली होती. पोलिसांनी त्या दोघांनाही मेयो रूग्णालयात दाखल केले. मात्र, उपचारादरम्यान डॉक्टरांनी काजलला मृत घोषित केले. तर कोमेशवर उपचार सुरु आहेत. याप्रकरणी कोमेशच्या तक्रारीवरून कळमना पोलिसांनी आरोपी ट्रक चालकाविरुद्ध गुन्ह्याची नोंद करून तपास सुरू केला आहे.