दुचाकी अपघातामध्ये तरुण ठार

। अलिबाग । प्रतिनिधी ।

अलिबाग-रेवस मार्गावर बुधवारी रात्री दुचाकीचा अपघात झाला. यामध्ये भादाणे येथील तरुण ठार झाला असून, तिघेजण जखमी झाले आहेत. ही घटना आरसीएफ प्रवेशद्वारसमोरील पायल हार्डवेअर दुकानासमोर घडली. याप्रकरणी अलिबाग पोलीस ठाण्यात गुन्हा दाखल करण्यात आला आहे.

किहीम येथील मिलिंद सुर्वे व त्याचा सहकारी शैलेश करळकर असे दोघेजण त्यांची दुचाकी घेऊन बुधवारी रात्री अलिबागहून रेवसकडे जात होते. दरम्यान, साडेआठ वाजण्याच्या सुमारास आरसीएफ गेटसमोर आल्यावर एक पादचारी रस्ता ओलांडत होता. त्यावेळी किहीमकडून येणार्‍या दुचाकीची सुर्वे यांच्या दुचाकीला धडक लागली. या धडकेत अक्षय अनिल राणे या तरुणाचा मृत्यू झाला. तसेच मिलिंद सुर्वे, शैलेश करळकर आणि सागर मानुर असे तिघेजण जखमी झाले आहेत. याप्रकरणी अलिबाग पोलीस ठाण्याचे पोलीस हवालदार विनोद गायकवाड अधिक तपास करीत आहेत.