हॉटेलमधील बालकामगार मुलीवर बलात्कार करणा-यास वरसगाव येथील हॉटेल मालकास २० वर्ष सक्तमजूरी
माणगाव विशेष न्यायालयाचा महत्वपूर्ण निर्णय
माणगाव | विशेष प्रतिनिधी ।
नोकरीचे आमिष दाखवून अल्पवयीन मुलीला आपल्या हॉटेलमध्ये कामावर ठेवून तिच्यावर वारंवार बलात्कार केल्याप्रकरणी वरसगाव येथील हॉटेल मालकाला माणगाव येथील न्यायालयाने २० वर्ष सक्तमजूरी व रु. २,६५,०००/- दंडाची शिक्षा ठोठावली
सदरची घटना कोलाड पोलिस स्टेशनच्या हद्दीतील मौजे वरसगाव, ता. रोहा येथील रेस्टॉरंट व लॉजिंग येथे दि. २१ ते २६ फेब्रुवारी २०२० चे दरम्यान घडली. नोकरीचे आमिष दाखवून अल्पवयीन मुलीला आपल्या हॉटेलमध्ये कामावर ठेवून तिच्यावर वारंवार बलात्कार केल्याप्रकरणी हॉटेल मालकावर गुन्हा दाखल होता.
या गुन्हयाचा तपास सहायक. पोलिस निरीक्षक, कोलाड पोलिस ठाणे पी. एस. तायडे, यांनी केला व आरोपींविरूद् न्यायालयात दोषारोप पत्र दाखल केले. सदर खटल्याची सुनावणी विशेष न्यायालय, माणगाव – रायगड येथे झाली व सदर गुन्हयात पिडीत मुलीची साक्ष व वैद्यकिय पुरावा महत्वाचा ठरला. सदर खटल्यामध्ये सहा सरकारी वकील ॲड योगेश तेंडूलकर यांनी सरकार पक्षाच्या वतीने काम पाहिले व कोर्टासमोर प्रभावीपणे युक्तिवाद करून महत्वाचे न्यायनिर्णय दाखल केले. सदर केसच्या सुनावणी दरम्यान पैरवी अधिकारी पोलिस उपनिरीक्षक, यु.एल. घुमास्कर, महिला पोलिस हवालदार छाया कोपनर, पोलिस हवालदार शशिकांत कासार, व शशिकांत गोविलकर यांनी सहकार्य केले. विशेष व सत्र न्यायाधीश हर्षल कि. भालेराव यांनी सदर घटनेतील गुन्हयाच्या शाबीतीनंतर आरोपीस दोषी ठरवून दि. ०७ डिसेंबर २०२२ रोजी २० वर्ष सक्तमजूरी व रु. २ लाख 65 हजार दंडाची शिक्षा ठोठावली.
