पनवेल महापालिकेचा 7 वा वर्धापनदिन

| पनवेल | वार्ताहर |

विकासाच्या नव्या महामार्गावरती महापालिकेच्या सुरू झालेल्या प्रवासाला सहा वर्षे पूर्ण झाली आहेत. पनवेल नगरपरिषदेसह 23 ग्रामपंचायतींना एकत्रित येऊन 1 ऑक्टोबर 2016 ला पनवेल महानगरपालिकेची स्थापना झाली होती. महापालिकेचा सातवा वर्धापनदिन मोठ्या उत्साहात साजरा केला जात आहे. आयुक्त गणेश देशमुख यांच्या मार्गदर्शनाखाली आदर्श शहराचे स्वप्न साकारले जात आहे.

गणेश देशमुख यांच्या मार्गदर्शनाखाली पनवेल महापालिकेने विकासकामांचा धडका सुरू केला आहे. परिस्थितीचा अभ्यास, नियोजन, काटेकोर अंमलबजावणी आणि सर्वांचा सहभाग या चतु:सुत्रीवर काम करत पनवेल महानगरपालिका आपल्या कार्यक्षेत्रात विविध विकासकामे वेगाने करत आहे. त्यामध्ये प्रामुख्याने महापालिकेची मुख्यालय इमारत, कळंबोली येथे 400 खाटांचे माता बाल संगोपन रुग्णालय व सिडकोच्या कम्युनिटी हॉल येथे 50 खाटांचे रूग्णालय उभारण्यात येणार आहे. येत्या काही दिवसांत महापालिकेच्या आस्थापनेवरील 377 पदं भरतीही केली जाणार आहे. दि.बा लोकनेते शाळेचे लोकार्पण, पुण्यश्लोक अहिल्यादेवी होळकर बहुद्देशीय सभागृह, अमृत योजनेंतर्गत 29 गावांमध्ये पायाभूत सुविधा, प्रधानमंत्री आवास योजना यांचा समावेश आहे.

कामाचा प्रचंड उरक, तातडीने निर्णय आणि लोकप्रतिनिधींना विश्वासात घेऊन काम करण्याच्या आयुक्तांच्या हातोटीमुळे पनवेल महानगरपालिका क्षेत्रातील नागरिकांना आपले प्रशासन एका सुरक्षित हातात असल्याचा विश्वास निर्माण झाला आहे.