बांधकाम व्यावसायिकांकडून कामांचा सपाटा
| उरण | वार्ताहर |
सिडकोच्या माध्यमातून द्रोणागिरी नोडची निर्मिती झाली आहे. परंतु, सदर नोड हा समुद्रकिनारी असल्याने त्याठिकाणी सीआरझेड कायदा लागू करण्यात आला असल्याचे अधिकृत सूत्रांकडून समजते. त्यामुळे सीआरझेडबाधित जागेवर बांधकाम करण्यास बंदी असतानाही द्रोणागिरी नोडमध्ये बिल्डर लॉबीकडून इमारती उभ्या करण्याचा सपाटा लावला आहे. परंतु, या बांधकामांवर भविष्यात कारवाईचे संकेत मिळत असल्याने बिल्डरांचे धाबे दणाणले आहेत.
शासनाने समुद्रकिनाऱ्यापासून काही अंतरावर सीआरझेडचा कायदा लागू केला आहे. त्या कायद्यांतर्गत बांधकाम करण्यास परवानगी नसते. मात्र, सिडकोने द्रोणागिरी नोड हे पूर्णपणे समुद्रकिनारी वसविले आहे. त्यामुळे त्या ठिकाणी सीआरझेड कायदा लागू करण्यात आल्याचे अधिकृत सूत्रांकडून समजते. या ठिकाणी ही बांधकाम करण्यास परवानगी नसतानाही बिल्डर लॉबीकडून इमारती उभ्या करून ग्राहकांच्या माथी मारण्याचा प्रयत्न सुरू आहे.
द्रोणागिरी नोडमध्ये बिल्डर लॉबीच्या आमिषाला बळी पडण्याआधी आपण घेत असलेल्या जागेचा सर्व्हे नंबर नक्कीच तोच आहे का दुसरा नाही ना? इथपासून ते सर्व कागदपत्रे खरी व नियमाला धरून काम होते की नाही याची पूर्णपणे खातरजमा करूनच आपला मेहनतीचा पैसा खर्ची लावा. कारण, सीआरझेड कायद्याचे उल्लंघन करणाऱ्या बिल्डर लॉबीच्या इमारतींवर भविष्यात कारवाई होणार असल्याचे संकेत अधिकृत सूत्राकडून समजते. यामुळे बिल्डर लॉबीचे धाबे दणाणले आहेत.