मतदार वाढले, मात्र मतदान केंद्र घटले
| रायगड | खास प्रतिनिधी |
2024च्या लोकसभा निवडणुकीसाठी 23 लाख 17 हजार 921 मतदार मतदानाचा हक्क बजावणार आहेत. मात्र, यंदा जिल्ह्यात तब्बल 23 हजार 795 नवीन मतदारांनी नोंदणी केली आहे. पहिल्यांदाच ते लोकसभेसाठी मतदार करणार आहेत. इतक्या मोठ्या संख्येने असलेले मतदार हेच खरे किंगमेकर ठरणार आहेत. हे मतदार ज्यांना मतदान करतील, त्या पक्षाच्या विजयावर शिक्कामोर्तब निश्चित आहे. दरम्यान, जिल्हा प्रशासनाने मतदान केंद्र सुसूत्रीकरण अंतर्गत जिल्ह्यातील मतदान केंद्रांची फेररचना केली आहे. त्यामुळे जिल्ह्यात मतदान केंद्रांची संख्या 39 ने कमी झाली आहे. ही संख्या दोन हजार 733 वरून दोन हजार 694 झाली आहे, अशी माहिती जिल्हा निवडणूक अधिकारी स्नेहा उबाळे यांनी ‘कृषीवल’शी बोलताना दिली.
मतदान केंद्रांची संख्या कमी झाली असली, तरी दुसरीकडे मतदारांचा टक्का मात्र वाढला आहे. जिल्ह्यात आजच्या स्थितीमध्ये 23 लाख 17 हजार 921 मतदार रायगड लोकसभा मतदारसंघात आहेत. पैकी 11 लाख 78 हजार 822 पुरुष मतदार आहेत, तर स्त्री मतदारांची संख्या 11 लाख 39 हजार 017 अशी असून, इतर मतदार 82 आहेत.
22 जानेवारी 2024 रोजी अंतिम मतदार याद्या प्रसिद्ध करण्यात येणार आहेत. विविध राजकीय पक्षांनी लोकसभा निवडणुकीची जोरदार तयारी सुरु केली आहे. एप्रिल महिन्यामध्ये निवडणुका होण्याची शक्यता वर्तवण्यात येत आहे. त्यानुसार निवडणूक विभागदेखील कामाला लागला आहे. मतदारयाद्यांमध्ये सातत्याने दुबार नावे, मयत मतदारांची नावे आढळत होती. त्यामुळे अशा नावांवर बोगस मतदान होण्याचा धोका वाढला होता. काही राजकीय पक्षांनी यावर वेळोवेळी आक्षेप घेतला होता. जिल्हा प्रशासनाने याबाबतीत सर्तक होत समानीकरण, पुनर्रिक्षण कार्यक्रमांतर्गत मतदारयाद्यांची पडताळणी सुरु केली. दुबार नावे, तसेच मयतांची नावे नियमानुसार वगळण्यात आली. याचा तपशील वेळोवेळी निवडणूक विभागाने जाहीर केलेला आहे.
रायगड जिल्ह्यात दोन हजार 733 मतदान केंद्रे होती. त्याची संख्या आता दोन हजार 694 झाली आहे. यातील विशेष बाब म्हणजे, यातील काही मतदान केंद्र ही पहिल्या मजल्यावर होती. त्यामध्ये प्रामुख्याने पनवेल तालुक्यामध्ये त्यांची संख्या अधिक होती. निवडणूक आयोगाच्या सूचनेनुसार ती तळमजल्यावर स्थलांतरीत करण्यात आली आहेत. मतदान केंद्र सुसूत्रीकरणानुसार मतदान केंद्राची संख्या कमी झाली आहे. दुसरीकडे मतदारांची संख्या मात्र वाढली आहे. आजच्या स्थितीमध्ये 23 लाख 17 हजार 921 मतदार रायगड लोकसभा मतदारसंघात आहेत. पैकी 11 लाख 78 हजार 822 पुरुष, तर स्त्री मतदारांची संख्या 11 लाख 39 हजार 017 अशी असून, इतर मतदार 82 आहेत. मतदारांच्या संख्येत वाढ व्हावी, यासाठी प्रशासनाने सातत्याने विविध उपक्रम राबवले होते. नव्याने करण्यात आलेल्या मतदारांमध्ये युवा मतदारांची संख्या वाढली आहे. 22 जानेवारीला अंतिम मतदार याद्या प्रसिद्ध करण्यात येणार आहेत.
मतदारसंघ | मतदान केंद्र |
पनवेल | 530 |
कर्जत | 335 |
उरण | 337 |
पेण | 375 |
अलिबाग | 337 |
श्रीवर्धन | 351 |
महाड | 393 |
एकूण | 2,694 |
मतदारसंघांवर दृष्टिक्षेप पनवेल विधानसभा मतदारसंघात 3,03,704 पुरुष, तर 2,62,187 महिला मतदार आहेत. त्यानुसार कर्जत: 1,53,466 पुरुष, 1,51,735 स्त्री, उरण: 1,52,730 पुरुष, 1,54,020 स्त्री, पेण: 1,52,060 पुरुष, 1,49,405 स्त्री, अलिबाग: 1,45,648 पुरुष, 1,48,422 स्त्री, श्रीवर्धन: 1,27,530 पुरुष, 1,32,243 स्त्री आणि महाड विधानसभा मतदारसंघात 1,40,691 पुरुष, 1,41,005 स्त्री तसेच 82 इतर मिळून 23 लाख 17 हजार 921 मतदार आहेत.
रायगड जिल्ह्यामध्ये नवीन मतदारांच्या संख्येत वाढ व्हावी, यासाठी जिल्हा प्रशासनाने विविध उपक्रम राबवले आहेत. प्रशासनाच्या आवाहनानंतर जिल्ह्यात तब्बल 23 हजार 795 नवीन मतदारांनी नोंदणी केली आहे. त्यामध्ये पुरुष मतदारांची संख्या 13 हजार 590, तर स्त्री मतदारांची संख्या 10 हजार 202 आणि इतर तीन मतदारांचा समावेश आहे.