पनवेल वसतिगृहात विद्यार्थ्यांच्या अन्नात झुरळ, अळ्या

बी.पी. मरीन अकादमीमधील धक्कादायक प्रकार; निकृष्ट अन्नामुळे आरोग्याचा प्रश्न ऐरणीवर

| पनवेल | विशेष प्रतिनिधी |

सागरी प्रशिक्षण अकादमी असलेल्या पनवेलमधील बी.पी. मरीन अकादमीमधील वसतिगृहात राहणाऱ्या विद्यार्थ्यांना निकृष्ट दर्जाचे अन्न दिले जात असून, अन्नात मेलेले झुरळ आणि धातूचे तुकडे आढळून आल्याने विद्यार्थ्यांच्या आरोग्यावर प्रश्न ऐरणीवर आला आहे.

शहरातील बंदर रोड येथे बी.पी. मरीन अकादमी या नावाने सागरी प्रशिक्षण देणारी अकादमी चालवली जाते. या ठिकाणी सागरी प्रशिक्षण घेण्यासाठी देशभरातून विद्यार्थी दाखल होत असल्याने अकादमीच्या आवरातच विद्यार्थ्यांना राहण्यासाठी वसतिगृह तसेच उपाहारगृह उपलब्ध करून देण्यात आले आहे. मात्र, मागील काही दिवसांपासून अकादमीमध्ये शिक्षण घेत असलेल्या विद्यार्थ्यांच्या अन्नात मेलेले झुरळ, धातूचे तुकडे तसेच अळ्या आढळून येत असल्याने विद्यार्थ्यांना जुलाब, उलट्या यासारख्या आजारांचा सामना करावा लागत आहे.

विद्यार्थ्यांनी दिलेल्या माहितीनुसार, मागील अनेक दिवसांपासून सुरु आलेल्या या प्रकारामुळे शहरातील ग्रामीण उपजिल्हा रुग्णालयात काही विद्यार्थ्यांवर उपचार करण्यात आले, तर काही विद्यार्थ्यांवर बेलापूर येथील रुग्णालयात उपचार करण्यात आले आहेत. विद्यार्थ्यांनी दिलेल्या माहितीनुसार अकादमीच्या वसतिगृहात प्री.सी. जनरल परपस रेटिंग या सहा महिन्यांच्या अभ्यासक्रमासाठी 400 विद्यार्थी शिक्षण घेत असून, 400 पैकी 300 विद्यार्थ्यांना अन्न आणि दूषित पाण्यापासून होणाऱ्या आजाराचा सामना करावा लागला आहे.तर, वसतिगृहातील शौचालयाचीदेखील दुरवस्था झाली असल्याचे विद्यार्थ्यांचे म्हणणे आहे.

तक्रार केल्यास नापास करण्याची धमकी
अकादमीत सुरु असलेल्या प्रकाराबाबत बाहेर वाच्यता केल्यास नापास करण्याची धमकी दिली जात असल्याचा आरोप विद्यार्थी करत आहेत. अकादमीमधील वरिष्ठांनी मात्र हा आरोप फेटाळला आहे.

मागील काही दिवसांपासून विद्यार्थ्यांना त्रास झाला असल्याची कबुली अकादमीमधील प्रशिक्षकांनी दिली. मात्र, काहीच विद्यार्थ्यांना हा त्रास जाणवल्याचे सांगत दूषित पाण्यामुळे हा त्रास होत असल्याचे प्रशिक्षकांचं म्हणणं आहे.

दूषित अन्नपुरवठा केल्याबद्दल संबंधित मेसला नोटीस बजावण्यात आली आहे. त्याचप्रमाणे मेस कमिटी प्रशिक्षणार्थींच्या तक्रारी जाणून घेत आहेत. दूषित पाणीपुरवठा होत असल्याने अनेकांना त्याचा त्रास झाला आहे.

कॅप्टन बादल सिंग,
डायरेक्टर,
बी.पी. मरीन अकादमी