| पनवेल | वार्ताहर |
आयुक्त डॉ. प्रशांत रसाळ यांच्या मार्गदर्शनाखाली स्वच्छ भारत अभियान अंतर्गत महापालिकेच्या घनकचरा व स्वच्छता विभागामध्ये द अर्बन लर्निंग इंटर्नशिप प्रोग्रॅम राबविला जात आहे. ट्युलिप हा केंद्र शासनाचा उपक्रम असून, विद्यार्थ्यांना शहरी प्रश्नांची जाणीव व्हावी व महापालिका करत असलेल्या कामाचे स्वरूप समजवून घेऊन आपल्या नवनवीन संकल्पना राबविण्याविषयी प्रोत्साहन देण्यात येत असते. या ट्युलिप कार्यक्रमांतर्गत महापालिकेच्यावतीने ऑनलाईन पध्दतीने अर्ज मागविण्यात आले होते. यामध्ये पिल्लई इंजिनिअरिंग कॉलेजचे सात व सरस्वती इंजिनिअरिंग महाविद्यालयाच्या एका विद्यार्थ्यांची निवड महापालिकेने केली आहे. उपायुक्त डॉ. वैभव विधाते यांच्या हस्ते या विद्यार्थ्यांना इंटर्नशिप पत्राचे वाटप करण्यात आले.
यावेळी घनकचरा व आरोग्य विभागाचे विभागप्रमुख अनिल कोकरे, पर्यावरण विभागाचे विभाग प्रमुख मनोज चव्हाण, अधिकारी व कर्मचारी उपस्थित होते. विद्यार्थ्यामध्ये कार्यात्मक कौशल्ये वाढविणे आणि त्यांच्या ऊर्जा व कल्पनांचा उपयोग करून शहरांच्या भविष्यासाठी उपाय तयार करण्यासाठी सहनिर्मिती करणे, स्थानिक स्वराज्य संस्थेच्यावतीने राबविण्यात येणार्या उपक्रम, आव्हाने यामध्ये विद्यार्थी पर्यायाने तरूण वर्गाचा सहभाग वाढविण्यासाठी ही ट्युलिप कार्यक्रमाची संकल्पना सुरू करण्यात आली आहे.
इंटर्नशिप पूर्ण झाल्यानंतर या विद्यार्थ्यांना महापालिकेच्यावतीने प्रमाणपत्र देण्यात येणार आहे. या प्रमाणपत्राचा उपयोग विद्यार्थ्यांना त्यांच्या भविष्यामध्ये त्यांच्या नोकरीमध्ये, व्यवसायामध्ये होणार आहे. त्यामुळे विद्यार्थ्यांनी सकारात्मक दृष्टीकोन ठेवून सक्रिय सहभाग नोंदवावा, असे आवाहन उपायुक्त डॉ. वैभव विधाते यांनी केले आहे.