। नेरळ । वार्ताहर।
कर्जत मुरबाड रस्त्यावर कळंब जवळील पोही फाटा येथे गॅस सिलिंडर घेवून जाणार्या टेम्पोने प्रवासी रिक्षाला धडक दिली.या अपघातात रिक्षाचे मोठे नुकसान झाले असून या अपघातात तिघे जखमी झाले आहेत. या अपघातास जबाबदार असल्याबद्दल टेम्पो चालक अमर राठोड यांच्यावर गुन्हा दाखल करण्यात आला आहे.
कळंब येथील प्रवासी रिक्षा रविवारी (दि.16) सकाळी प्रवाशांना घेवून निघाली होती. साडेआठ वाजण्याच्या सुमारास पनवेल येथून कर्जत रस्त्याने शहापूरकडे निघाली होती. टाटा अल्ट्रा टेम्पोने रिक्षाला धडक देत रिक्षाला ओढत नेली. प्रवासी रिक्षाचे मालक यशवंत परशुराम डोंगरे हे प्रवाशांना घेवून निघाले होते. त्यांच्या प्रवासी रिक्षाला गॅस सिलिंडरने भरलेल्या टेम्पोने धडक दिली असून या धडकेत रिक्षा खांबावर जावून आदळली. टेम्पो चालक अमर राठोड यांने भरधाव वेगाने आणि रस्त्याची तीन चौक लक्षात न घेता हयगय करीत वाहन चालविल्याने हा अपघात घडला आहे. या अपघातास कारणीभूत असलेले टेम्पोवर अपघाताची जबाबदारी टाकण्यात आली आहे.जखमी प्रवाशांना कळंब प्राथमिक आरोग्य केंद्रात प्राथमिक उपचार करण्यात आले आहेत. भरधाव वेगाने येत असल्याने चालकाचे नियंत्रण सुटले व नेरळ दिशेला जात असणार्या रिक्षा चालक यशवंत परशुराम डोंगरे यांच्या रिक्षाला जोरात धडक दिली. त्यावेळी रिक्षामध्ये दोन प्रवासी होते. सुदैवाने कोणतीही जीवितहानी झाली नसून प्रवासी आणि रिक्षा चालक यांस किरकोळ दुखापत झाली आहे. जखमी प्रवासी पुंडलिक डोंगरे, गौतम बनसोडे आणि अवधूत सोनावणे हे प्रवासी होते. रिक्षाचा पूर्ण चक्कचूर झाला असून रिक्षेचे मोठ्या प्रमाणात नुकसान झाले आहे. अपघातानंतर गॅस सिलिंडर वाहून नेणारी गाडी पोलिसांनी कळंब आऊट पोस्ट येथे ठेवली आहे. टेम्पोचालक अमर राठोड बदलापूर यांच्यावर गुन्हा नोंद केला आहे.