कर्जतमधील पंचतारांकित हॉटेलमध्ये कर्मचाऱ्याचा मृत्यू

। कर्जत । प्रतिनिधी ।

कर्जतमधील एका हॉटेलमध्ये कर्मचाऱ्याचा संशयास्पद मृत्यू झाल्याने एकच खळबळ उडाली आहे. कर्जत चौक राज्यमार्ग रस्त्यावर असलेल्या ओलियंडर सॉल्ट या पंचतारांकित हॉटेलमध्ये संशयास्पद मृत्यू झालेला हा तरुण हाऊसकीपिंगचे काम करत होता.

मिळालेल्या माहितीनुसार, कर्जत तालुक्यातील मांडवणे येथील समीर करवंदे (33) या कामगाराचा ओलियंडर सॉल्ट या पंचतारांकित आलिशान हॉटेलमध्ये मृत्यू झाला आहे. ही घटना शुक्रवारी (दि. 3) दुपारी उघडकीस आली. सुमारे दीडशे एकर जागेत उभारलेल्या ओलियंडर सॉल्ट या आलिशान रिसॉर्टमध्ये समीर करवंदे हाऊसकीपिंग विभागात दीड वर्षांपासून कार्यरत होता. नेहमीप्रमाणे कामाच्या ठिकाणी तो काही साहित्य आणण्यासाठी आपल्या रूममध्ये गेला होता. मात्र, काही वेळाने तो रूममध्येच मृत अवस्थेत आढळून आला. त्याचा सहकारी एका कामानिमित्त तेथे गेला असता त्याला समीर जमिनीवर पडलेला दिसला. तातडीने त्याला उपजिल्हा रुग्णालय, कर्जत येथे हलवण्यात आले. मात्र, डॉक्टरांनी तपासून त्याला मृत घोषित केले. समीर करवंदेचा मृत्यू हृदयविकाराच्या झटक्याने झाला, की अन्य काही कारणामुळे, याबाबत कोणतीही माहिती मिळालेली नाही. शवविच्छेदन अहवाल आल्यानंतरच मृत्यूचं नेमकं कारण समोर येईल, अशी माहिती डॉक्टरांनी दिली आहे. या घटनेनंतर कर्जत पोलीस ठाण्याचे पोलीस उपनिरीक्षक किरण नवले यांनी पथकासह घटनास्थळी भेट देऊन पंचनामा केला. पोलिसांनी प्राथमिक चौकशी सुरू केली असून अधिक तपास सुरू असल्याचं सांगण्यात आले आहे. या घटनेमुळे पंचतारांकित सॉल्ट हॉटेलमध्ये खळबळ उडाली आहे.