एपस्टिन फाइल्सबाबत धक्कादायक खुलासा

| नवी दिल्ली | वृत्तसंस्था |

एपस्टिन फाइल्स प्रकाशित झाल्यानंतर जगभरात खळबळ उडाली आहे. अमेरिकेच्या न्याय विभागाने नुकतेच एपस्टिन फाइल्स ट्रान्सपरन्सी ॲक्ट अंतर्गत 35 लाखांपेक्षा जास्त कागदपत्रे, ईमेल, पोलीस रिपोर्ट, फोटो आणि व्हिडीओ जारी केले आहेत. त्यात जेफ्री एपस्टिन आणि गिसलेन मॅक्सवेल यांच्याकडून चालवल्या जाणाऱ्या लैंगिक शोषणाच्या रॅकेटबाबत धक्कादायक गोष्टींचा खुलासा झाला आहे. या फाइल्समुळे फक्त अमेरिकाच नाही तर युरोप आणि इतर देशातील अनेक बड्या लोकांबाबत प्रश्नचिन्ह निर्माण झाले आहे.

दरम्यान, एपस्टिनने हजारो मुलींना त्याच्या रॅकेटमध्ये कसे ओढले, हा प्रश्न उपस्थित होत आहे. त्याची खरी सुरुवात मिशिगनमधील उन्हाली कला शिबिरापासून झाली होती. त्याठिकाणी एक 14 वर्षांची मुलगी गिसलेन मॅक्सवेल हिला भेटली. मॅक्सवेल तिच्याशी बोलत असताना जेफ्री एपस्टिन त्याठिकाणी पोहोचले. त्यांनी विद्यार्थ्यांना शिष्यवृत्ती आणि त्याच्या नावाने उभारलेल्या निवासी शिबिराबद्दल सांगितले. त्यानंतर एपस्टिनने त्या अल्पवयीन मुलीच्या आईला त्यांच्या आलिशान बंगल्यात बोलावले. मुलीच्या कलागुणांचे कौतुक करत मदतीचे आश्वासन दिले. या आश्वासनाला बळी पडल्यानंतर काही महिन्यातच एपस्टिनला मसाज करण्याच्या कामासाठी ती अल्पवयीन मुलगी यायला लागली. त्यातूनच तिच्या लैंगिक शोषणाला सुरुवात झाली. जवळपास 3 वर्षे त्या मुलीचे लैंगिक शोषण सुरू होते. मात्र, या 14 वर्षीय मुलीची ही कहाणी 35 लाख कागदपत्रांमध्ये असलेल्या शेकडो मुलींपैकी एकीची आहे. एपस्टिन फाइल्समध्ये असलेल्या फोटो आणि व्हिडीओवरून लैंगिक शोषणाला बळी पडलेल्या मुली आणि महिलांची संख्या 1 हजार पेक्षा जास्त आहे.

एपस्टिन मसाजसाठी 300 अमेरिकन डॉलर द्यायचे. जर एखादी मुलगी तिच्या मैत्रिणीला घेऊन गेली तर तिला वेगळे 300 डॉलर मिळायचे. त्यातून नेटवर्क तयार झाले आणि लैंगिक शोषणाचे रॅकेट चालू लागले. पीडितांना देशभरात पाम बीच, न्यूयॉर्क, न्यू मेक्सिको किंवा एपस्टिनच्या खासगी बेटावर नेले जायचे. तसेच, फाइल्समध्ये अनेकदा गर्भपात केल्याच्या घटनांचाही उल्लेख आहे. जेफरी एपस्टिनला या प्रकरणी अटकही झाली होती. तुरुंगात असताना 2019 मध्ये जेफ्री एपस्टिनने आत्महत्या केली होती. तर, त्याची साथीदार गिसलेन मॅक्सवेलला 2022 मध्ये 20 वर्षांची शिक्षा सुनावण्यात आली. 2020 मध्ये स्थापन केलेल्या भरपाई निधीतून 150 पीडितांना एकूण 120 मिलियन अमेरिकन डॉलरची नुकसान भरपाई दिली गेली. परंतु, आर्थिक मदत त्या संकटातून बाहेर येण्यास पुरेशी नाही असे अनेक पीडितांनी म्हटले आहे.