खोदकामाचे यंत्र अंगावर पडून पोलिसाचा मृत्यू

| मुंबई | प्रतिनिधी |

शीव-पनवेल महामार्गावरील मानखुर्द परिसरात सुरू असलेल्या उड्डाणपूल बांधकामादरम्यान भीषण दुर्घटनेत एका पोलीस शिपायाचा दुर्दैवी मृत्यू झाला. उड्डाणपुलाच्या खोदकामासाठी वापरले जाणारे अवजड यंत्र अचानक कोसळून त्यांच्या अंगावर पडल्याने हा अपघात घडल्याचे स्पष्ट झाले आहे.

वाढत्या वाहतूक कोंडीतून मुंबईकरांची सुटका करण्यासाठी मानखुर्द परिसरात गेल्या काही महिन्यांपासून उड्डाणपूलाचे बांधकाम करण्यात येत आहे. याच उड्डाणपुलाच्या खोदकामासाठी उभे असलेले एक मोठे यंत्र मंगळवारी रात्री अचानक रस्त्यावर कोसळले. याच वेळी मुंबई पोलीस दलातील पोलीस शिपाई संतोष चौहान तेथून दुचाकीवरून नवी मुंबई येथील घरी जात होते. त्यांच्या अंगावर हे यंत्र पडल्याने ते गंभीर जखमी झाले. त्यांना तात्काळ गोवंडीमधील शताब्दी रुग्णालयात दाखल करण्यात आले. मात्र उपचारापूर्वीच त्यांचा मृत्यू झाला. या प्रकरणी मानखुर्द पोलिसांनी घटनेची नोंद करून तपास सुरू केला.