टँकरच्या धडकेत तिघांचा मृत्यू

दोघेजण मनपाचे कर्मचारी
| पनवेल | वार्ताहर |
पनवेल जवळील तळोजा औद्योगिक वसाहतीमध्ये दिपक फर्टिलायझर्स कंपनी जवळच्या रस्त्यावर सोमवारी (29 नोव्हेंबर) झालेल्या भीषण अपघातात पनवेल महापालिकेच्या दोन कंत्राटी सफाई कामगारांसह सिडकोच्या माळी कामगाराचा मृत्यू झाला आहे. पनवेल महानगरपालिकेत काम करणारे दोन कंत्राटी सफाई कामगार तसेच सिडकोचा एक माळी कामगार हे तळोजा एमआयडीसीतील काम करून मोटारसायकलवरून घरी परत जात होते. दिपक फर्टिलायझर कंपनी जवळच्या रस्त्यावर एका टँकरखाली चिरडून दोन सफाई कामगारांचा जागीच मृत्यू झाला तर माळी कामगाराचा एमजीएम हॉस्पिटलमध्ये मृत्यू झाल्याची माहिती मिळाली आहे. शांताराम निरगुडा आणि काळुराम पारधी या दोन सफाई कामगारांचा जागीच मृत्यू झाला आहे. अपघात झाल्याचे समजताच ताबडतोब मोठी गर्दी जमा झाली. पोलिसांनी ताबडतोब घटनास्थळी येऊन जमावाला शांत केले. दरम्यान साई गणेश इंटरप्रायझेस या कंपनीचे व्यवस्थापक राकेश भुजबळ यांच्याशी संपर्क साधला असता त्यांनी या वृत्ताला दुजोरा देत असताना सांगितले की शांताराम निरगुडा वय (27 वर्ष ) आणि काळुराम पारधी (वय 27 वर्ष) हे दोन्ही कामगार हे आमच्याकडे कामाला असून कामावरून घरी जात असताना त्यांना अपघात झाल्याची माहिती मिळाली आहे. दोघांना उपजिल्हा रुग्णालयात आणले असता त्यांना मृत घोषित करण्यात आले आहे. तसेच त्यांच्यासोबत त्यांचा मित्र भुर्‍या पारधी हा माळी कामगार होता. अपघातात गंभीर जखमी झाल्याने त्याला एमजीएम रुग्णालयात दाखल करण्यात आले आहे, परंतु त्याचाही मृत्यू झाला आहे. या अपघाताची नोंद तळोजा पोलिस ठाण्यात करण्यात आली आहे.