46 हजार कुटूंबांना वैयक्तीक नळ जोडणीची प्रतिक्षा
| रायगड | जिल्हा प्रतिनिधी |
प्रति माणसी, प्रति दिन 55 लीटर पाणी देण्याचे अमिष दाखवून रायगड जिल्ह्यात जलजीवन योजना राबविण्यात आली. मात्र, जिल्ह्यातील 46 हजार कूटूंबिय आजही वैयक्तीक नळ जोडणीपासून वंचित असल्याचे समोर आले आहे. या हजारो कुटूंंबामध्ये जलजीवनचे पाणीच पोहचले नसल्याची माहिती जिल्हा परिषदेच्या ग्रामीण पाणी पुरवठा विभागाकडून मिळालेल्या आकडेवारीनुसार दिसून आली आहे.
शाश्वत पाणी पुरवठ्याबरोबरच पाण्याची बचत, पाण्याचा काटकसरीने वापर, पाण्याची गुणवत्ता अबाधित राखण्यासाठी जलजीवन योजना सुरु करण्यात आली. जिल्ह्यामध्ये 809 ग्रामपंचायती असून 1 हजार 830 महसूली गावे आणि 5 हजार 3 पेक्षा अधिक गावे व वाड्यांचा समावेश आहे. रायगड जिल्ह्यामध्ये केंद्र सरकार पूरस्कृत जलजीवन मिशन योजना रायगड जिल्हा परिषद ग्रामीण पाणी पुरवठा विभागामार्फत राबविण्यात आली. या योजेनअंतर्गत ग्रामीण भागातील सर्व कुटूंबाना ‘हर घर नल से जल’ या प्रमाणे पाणी पुरवठा करणे. ग्रामीण भागातील प्रत्येक घरात वैयक्तीक नळ जोडणीद्वारे किमान प्रति दिवस 55 लीटर गुणवत्तापूर्ण पाणी पुरवठा करणे, हे या योजनेचा मुख्य उद्देश आहे. जलजीवन मिशन कार्यक्रमांतर्गत जिल्हा पाणी व स्वच्छता समिती व शासनामार्फत मंजूरी प्राप्त 1 हजार 592 योजनांच्या 2022-2023-2024 वर्षाचा कृती आराखड्यात समाविष्ट करण्यात आल्या. त्यापैकी आजपर्यंत 936 योजना भौतिकदृष्ट्या पुर्ण असून, त्यापैकी 262 योजना आर्थिक दृष्ट्या पुर्ण करण्यात आल्या आहेत. उर्वरित योजना प्रगती पथावर असल्याची माहिती ग्रामीण पाणी पुरवठा विभागाकडून देण्यात आली.
जिल्ह्यामध्ये 5 लाख 48 हजार 620 इतकी कुंटूबे असून, 5 लाख 1 हजार 973 कुटूंबांना वैयक्तीक नळ कनेक्शन देण्यात आले असल्याची माहिती जिल्हा परिषद ग्रामीण पाणी पुरवठा विभागाकडून देण्यात आली आहे. मात्र, उर्वरित 46 हजार 644 कुटूंबे अजूनही वैयक्तीक नळ जोडणीपासून वंचित असल्याची माहिती आकडेवारीनुसार समोर आली आहे. या नळ जोडणीचे काम प्रगती पथावर असल्याचे कारण देण्यात आले आहे. त्यामुळे जिल्ह्यातील हजारो कुटूंबीय जलजीवन योजनेपासून वंचित असल्याचे उघड झाले आहे.






