| महाड | प्रतिनिधी |
महाड नगरपालिकेतील स्वीकृत नगरसेवकपदाच्या निवडीवरून नवा वाद निर्माण झाला आहे. नगराध्यक्ष सुनील कविस्कर यांनी राजेश शिंदे यांची स्वीकृत नगरसेवक म्हणून निवड केल्यानंतर उपनगराध्यक्ष संदीप जाधव यांनी या निवडीला हरकत घेतली आहे. राजेश शिंदे यांचे नामनिर्देशन वैध नसल्याचा दावा करत त्यांची नियुक्ती रद्द करण्याची मागणी जाधव यांनी प्रांताधिकाऱ्यांकडे केली आहे.
महाड नगरपालिकेच्या स्वीकृत नगरसेवक पदासाठी राजेश शिंदे यांनी उमेदवारी अर्ज दाखल केला होता. या अर्जाची छाननी केल्यानंतर नगराध्यक्ष सुनील कविस्कर यांनी त्यांची स्वीकृत नगरसेवक म्हणून निवड केली. मात्र, या निवडीवर उपनगराध्यक्ष संदीप जाधव यांनी आक्षेप नोंदवला आहे. महाराष्ट्र नगरपरिषद अधिनियम 1965 मधील तरतुदींनुसार राजेश शिंदे यांची स्वीकृत नगरसेवक म्हणून नियुक्ती नियमबाह्य असल्याचे जाधव यांचे म्हणणे आहे. तसेच, नामनिर्देशनासाठी ज्या संस्थेचे सदस्यत्व प्रमाणपत्र सादर करण्यात आले आहे, ते प्रमाणपत्र चुकीचे असल्याचा आरोपही त्यांनी केला आहे. संबंधित संस्थेने दिलेल्या प्रमाणपत्राच्या वैधतेवर प्रश्नचिन्ह उपस्थित करत या संस्थेविरोधात कायदेशीर गुन्हा दाखल करण्यासह पुढील कारवाई करणार असल्याचा इशारा संदीप जाधव यांनी दिला आहे. याशिवाय, प्रांताधिकाऱ्यांकडे तक्रार करून राजेश शिंदे यांची स्वीकृत नगरसेवकपदी झालेली नियुक्ती रद्द करण्याची मागणी करण्यात आली आहे. या प्रकरणामुळे महाड नगरपालिकेतील स्वीकृत नगरसेवक निवडीचा मुद्दा चर्चेत आला असून, प्रांताधिकारी या तक्रारीवर काय निर्णय घेतात, याकडे आता सर्वांचे लक्ष लागले आहे.






