फिनोजल कंपनीत केमिकल पावडर गळती

साजगाव परिसरात भितीचे वातावरण

| खोपोली | वार्ताहर |

साजगांव परिसरातील युनिव्हर्सल इंडस्ट्रियल इस्टेट मधील फिनोजल कंपनीत केमिकलमध्ये पावडर जास्त प्रमाणात पडल्याने रियक्टर बँक मारत पावडर बाहेर फेकल्यामुळे तीन कामगार गुदमरल्याची घटना गुरूवारी घडली. घटनास्थळी नायब तहसीलदार सुधाकर राठोड, सहाय्यक पोलिस निरिक्षक हरेश काळसेकर केमिकल एक्सपर्ट गिध यांच्या समवेत परिस्थिती नियंत्रणात आणली असून एका कामगाराची परिस्थिती चिंताजनक असल्याने खारघर येथे हलविण्यात आले तर दोन जण खोपोली जाखोटीया हाँस्पिटलमध्ये उपचार घेत आहे.या घटनेची माहिती सर्वत्र पसरताच नागरिकांमध्ये भितीचे वातावरण पसरले आहे.

युनिव्हर्सल इंडस्ट्रियल इस्टेट येथे वाहनांसाठी आँईल तयार करणारी फिनोजल कंपनी आहे. या कंपनीतील एका प्लँटमध्ये कामगार केमिकलमध्ये पावडर टाकत असताना जास्त प्रमाणात पावडर पडल्यामुळे रियॅक्टरमधून पावडर बँक मारल्यानंतर पावडर प्लँटमध्ये पसरल्याने तीन कामगार गुदमरले होते. प्रशांत धाडवे (वय 25) याची परिस्थिती गंभीर असल्याने खारघर येथे हलविण्यात आले तर सिद्धेश मल्हार (वय 20) राम सिंग (वय 21) यांच्यावर खोपोलीतील जाखोटीया हॉस्पिटलमध्ये उपचार सुरू आहे. घटनेची माहिती मिळताच नायब तहसीलदार सुधाकर राठोड,सहाय्यक पोलिस निरिक्षक हरेश काळसेकर घटनास्थळी पोहचले त्यानंतर केमिकल एक्सपर्ट धनजंय गिध यांना बोलविण्यात आले. केमिकल एक्स्पर्ट धनंजय गीध यांनी कंपनीतील घटनास्थळी खात्री करून परिस्थिती नियंत्रणात असल्याचे सांगितले.