। नवी दिल्ली । वृत्तसंस्था ।
13 जानेवारी 2025 भारताच्या राजधानीतील इंदिरा गांधी इनडोअर स्टेडियममध्ये खो-खो विश्वचषकाला शानदार रंगारंग सांस्कृतिक कार्यक्रमाने सुरुवात झाली व उपराष्ट्रपती मा. जगदीप धनखड यांच्या हस्ते विश्वचषक स्पर्धेचे उद्घाटन झाले याप्रसंगी केंद्रीय क्रीडा मंत्री डॉ. मनसुख मांडविया व क्रीडा राज्य मंत्री रक्षा खडसे उपस्थित होत्या. तसेच ऑलिम्पिक असोसिएशनच्या अध्यक्षा पी.टी उषा सुध्दा उपस्थित होत्या. यावेळी खो-खो महासंघाचे अध्यक्ष सुधांशू मित्तल, सरचिटणीस महेंद्रसिंग त्यागी, सह सचिव प्रा. डॉ. चंद्रजीत जाधव व महासंघाचे विविध पदाधिकारी उपस्थित होते.
या स्पर्धेत 23 देशांतील 39 संघांनी सहभाग नोंदवला आहे. स्पर्धेतील 20 पुरुष आणि 19 महिला संघांनी उद्घाटन प्रसंगी संचालनात भाग घेतला व संपूर्ण मैदानाला फेरी मारून उत्साह वाढवणार्या प्रेक्षकांचे आभार मानले. या संचालनात भारतीय महिला खेळाडूंनी साडी परिधान करून आपल्या देशाची परंपरा व संस्कृती जपत एक वेगळा संदेश दिला. यावेळी भारताचे कर्णधार प्रतिक वाईकर व प्रियांका इंगळे यांनी शपथ घेतली त्यावेळी इतर देशांचे कर्णधार त्यांच्या मागे उभे राहून शपथ घेतली. तसेच भारत विरुध्द नेपाळ सामन्यावेळी बीसीसीआयचे उपाध्यक्ष राजीव शुक्ला उपस्थित होते. सामना जवळजवळ 8:30 वाजता सुरु झाला.