आता नव्या विषाणूची धास्ती; राज्यात आढळला दुसरा रुग्ण

। पालघर । प्रतिनिधी ।
पालघर जिल्ह्यातील तलासरी येथील झाई आश्रम शाळेतील सात वर्षीय मुलीला झिका विषाणूची लागण झाली आहे. झिकाचा हा राज्यातील दुसरा रुग्ण आहे. पुण्याच्या राष्ट्रीय विषाणू विज्ञान प्रयोगशाळेच्या अहवालात हे स्पष्ट झाले आहे. जुलै 2021 मध्ये पुणे जिल्ह्यात राज्यातील पहिला झिका रुग्ण आढळला होता. या अनुषंगाने पालघर येथे सर्वेक्षण, कीटक व्यवस्थापन उपचार आणि आरोग्य शिक्षण अशा प्रतिबंधात्मक आणि नियंत्रणात्मक उपाययोजना करण्यात येत असल्याचे आरोग्य विभागाने सांगितले आहे.

झाई आश्रमशाळेमध्ये शनिवारी दहा वर्षाच्या मुलीचा मृत्यू झाला. यानंतर या शाळेतील विद्यार्थिनीची तपासणी केली असता 15 विद्यार्थिनींना अंगदुखी, डोकेदुखी, ताप ही लक्षणे आढळून आली. त्यामुळे या विद्यार्थिनींना शनिवारी सायंकाळी रुग्णालयात उपचारासाठी दाखल केले. या विद्यार्थिनींचे नमुने एनआयव्हीला तपासणीसाठी पाठविले. यामध्ये एका मुलीला झिकाची लागण झाल्याचे आढळले आहे, तर अन्य सहा विद्यार्थिनींना स्वाईन फ्लूची बाधा झाल्याचे स्पष्ट झाले आहे. या सर्व विद्यार्थिनींची प्रकृती स्थिर असून सात दिवस त्यांना देखरेखीसाठी रुग्णालयात ठेवले जाईल, अशी माहिती जिल्हा शल्यचिकित्सक डॉ. संजय बोदाडे यांनी दिली.