माथेरानच्या जंगलात सिमेंट पिशव्यांचा खच

निसर्ग पर्यटन संस्थेचे पालिकेला निवेदन

| नेरळ | प्रतिनिधी |

माथेरान हे थंड हवेचे ठिकाण, तेथील घनदाट जंगल आणि निसर्गसंपन्न वातावरण यामुळे प्रसिद्ध आहे. मात्र, त्याच जंगलात वनसंपदा कमी करण्यासाठी शासनाच्या योजना राबविणारे ठेकेदार आपले कष्ट कमी करण्यासाठी पळवाटा काढताना दिसत आहेत. तीन वर्षांपूर्वी माथेरानचे विविध भागात रस्त्यांची कामे करण्यासाठी आणलेल्या सिमेंट पिशव्या जंगलात फेकून देण्याचे प्रकार झाले होते. दरम्यान, पालिकेने संबंधित ठेकेदारांना रिकाम्या पिशव्या उचलण्याचे आदेश दिले होते. मात्र, आजही जंगलात हजारो पिशव्या अस्तव्यस्त पडून आहेत. या पिशव्या उचलण्याची कार्यवाही माथेरान पालिकेच्यावतीने ठेकेदारामार्फत व्हावी, अशी मागणी माथेरानमधील निसर्ग पर्यटन संस्थेने केली आहे.

माथेरान या थंड हवेच्या ठिकाणी असलेले रस्ते क्ले पेव्हर ब्लॉकचे बनविण्यासाठी मुंबई महानगर प्रदेश विकास प्राधिकरणकडून निधी मिळाला होता. त्या निधीमधून क्ले पेव्हर ब्लॉकचे रस्ते बनविण्यासाठी सिमेंटच्या रिकाम्या पिशवीमध्ये क्ले पेव्हर तसेच, वाळू आणण्यात आली होती. लाखो पिशव्यांमधून साधारण वर्षभर दस्तुरी येथून मालवाहू घोड्यावरून क्ले पेव्हर आणले जात होते. मात्र, पिशव्यांमधून आणलेले क्ले पेव्हर उतरवल्यावर त्या सिमेंट पिशव्या एकत्रित गोळा करण्याची गरज होती. मात्र, ठेकेदाराने आपली कामे पूर्ण झाल्यावर मुंबई महानगर विकास प्राधिकरणकडून त्या पिशव्या उचलून पुन्हा दस्तुरी येथे नेल्या नाहीत. परिणामी, त्या रिकाम्या पिशव्या या अस्तवस्त होऊन जंगलात वार्‍यासोबत कुठेही उडून गेल्या आणि तीन वर्षे जंगलात तशाच पडून आहेत.

दरम्यान, या पिशव्यांमुळे जंगलात नवीन झाडांची उगवण्याचे प्रमाण कमी झाले आहे. तसेच, जंगलात मातीची पाणी साठवण्याची क्षमतादेखील कमी झाली आहे. हे लक्षात घेऊन माथेरान पालिकेला आतापर्यंत अनेकांनी त्या पिशव्या उचलून बाहेर काढण्यासाठी निवेदन दिले आहे. मात्र, पालिका मुख्याधिकारी त्यावर कोणतीही कार्यवाही करताना दिसत नाहीत. रस्त्यांच्या कामासाठी आणलेले क्ले पेव्हर यांच्यासाठी सिमेंट पिशव्या वापरण्यात आल्या होत्या, त्या पिशव्या संबंधित कामाच्या ठेकेदाराने उचलणे आवश्यक होते. मात्र, त्या उचलण्याची कार्यवाही व्हावी आणि संबंधित रस्त्यांच्या कामांचे ठेकेदार यांच्यावर पालिकेने दंडात्मक कारवाई करावी, अशी मागणी माथेरान निसर्ग पर्यटन संस्थेने केली आहे.

जंगल नष्ट होण्यास त्या प्लास्टिक सिमेंट पिशव्या कारणीभूत ठरत असून, पालिकेने याबाबत तात्काळ निर्णय घ्यावा, अशी मागणी माथेरान निसर्ग स्टॉल पर्यटन संस्थेच्यावतीने अध्यक्ष संतोष कदम, तसेच संस्थेचे विजय सावंत, योगेश शिंदे यांनी पालिकेत जाऊन मागणी केली आहे. माथेरानसारख्या केवळ पर्यटनावर अवलंबून असलेल्या पर्यटनस्थळी जंगलात प्लास्टिक पिशव्यांचा खच ही स्वच्छ शहर म्हणून बिरुदावली मिरवणार्‍या माथेरान शहरासाठी आणि गिरीस्थान नगरपरिषदेसाठी भूषणावह बाब नाही, अशी टीका संतोष कदम यांनी केली आहे.