भरधाव कारची दुभाजकाला धडक; दोघांचा मृत्यू , चार जण जखमी

| मुंबई | प्रतिनिधी |

पूर्व मुक्त मार्गांवर ऑरेंज गेट जवळ सोमवारी (दि.14) पहाटे 5 वाजता झालेल्या भीषण अपघातात दोघांचा मृत्यू झाला असून, चार जण गंभीर जखमी झाले. भरधाव वेगात असलेल्या कारने दुभाजकाला धडक दिल्याने हा अपघात घडला. याप्रकरणी शिवडी पोलिसांनी चालकाविरोधात गुन्हा दाखल केला.

मिळालेल्या माहितीनुसार, पांढऱ्या रंगाची इको कार पूर्व मुक्तमार्गांवरील ऑरेंज गेटजवळ दुभाजकावर धडकली. या अपघातात कारमधील सहा जण गंभीर जखमी झाले. जखमींना तत्काळ जे.जे. रुग्णालयात दाखल करण्यात आले. मात्र, डॉक्टरांनी विनोद वायडे (52) आणि अनिता जैस्वार (60) यांना मृत घोषित केले. उर्वरित चार जणांवर जे.जे. रुग्णालयात उपचार सुरू आहेत. जखमींपैकी खुशबू राजभर (21) या कळवा येथील हिंदी हायस्कूलमध्ये शिक्षिका आहेत. चालक चेतन पाटील हा अतिशय भरधाव वेगात वाहन चालवत होता. वारंवार सावधगिरी बाळगण्यास सांगितले, तरी त्याने ऐकले नाही. परिणामी, ऑरेंज गेट रॅम्पजवळ त्याचे वाहनावरील नियंत्रण सुटले आणि इको थेट दुभाजकावर धडकली. यात विनोद वायडे आणि अनिता जैस्वार यांचा जागीच मृत्यू झाला. खुशबूच्या तक्रारीवरून शिवडी पोलिसांनी चालक चेतन पाटील याच्याविरोधात गुन्हा दाखल केला आहे. चालक व अन्य जखमींच्यावर सध्या जे.जे. रुग्णालयात उपचार सुरू आहेत. चालकावरील उपचार झाल्यानंतर त्याच्याविरोधात पुढील कायदेशीर कारवाई करण्यात येणार आहे.