नवऱ्याच्या डोळ्यासमोर तिने घेतला अखेरचा श्वास; आगरसूरे फाट्यावर अपघात

| अलिबाग | विशेष प्रतिनिधी |
एसटीला थांबवण्याच्या प्रयत्नात रस्ता ओलांडणाऱ्या आदिवासी महिलेचा एसटी बस खाली चिरडल्याने जागीच मृत्यू झाल्याची घटना घडली. सदर अपघात आगरसूरे फाट्यावर मंगळवारी (दि.27) सकाळी ८.५० च्या सुमारास घडला. रंजना किसन भस्मा 30 रा. सडावाडी, बेणसे तालुका पेण असे या अपघातात मृत्यू झालेल्या आदिवासी महिलेचे नाव आहे. अलिबाग आगाराची एमएच 14 बीटी 2273 ही सासवणे-पनवेल सकाळी 8.20 वाजता सासवणे येथून निघाली.

सदर बस आगरसुरे फाटा येथे आली असता अलिबागकडे जाणाऱ्या रंजना किसन भस्मा यांनी बस चालकाला हात करीत बस थांबवण्याचा प्रयत्न करीत रस्ता ओलांडू लागल्या. मात्र बस न थांबवता चालक शैलेश केशव पाटील यांनी सुरूच ठेवल्याने बसची जोरदार धडक बसून रंजना किसन भस्मा या बसखाली सापडल्या. बसच्या चाकाखाली चिरडल्याने गंभीर जखमी झाल्याने त्यांचा जागीच मृत्यू झाला. त्यांच्यासोबत असलेल्या पती किसन भस्मा यांच्या समोरच त्यांचा अपघात झाला. त्यांना जिल्हा रुग्णालयात आणले असता वैद्यकीय अधिकाऱ्यांनी त्यांचा मृत्यू झाल्याचे जाहीर केले. सदर अपघात होताच बस चालक शैलेश पाटील हा मांडवा सागरी पोलीस ठाण्यात स्वतः हजर झाला. याप्रकरणी पोलिस ठाण्यात गुन्हा दाखल करण्याची प्रक्रिया सुरू आहे