जिल्ह्यात लाल परी पुन्हा रस्त्यावर
। अलिबाग । विशेष प्रतिनिधी ।
विविध मागण्यांसाठी राज्यभरात सुरु केलेल्या बंद आंदोलन स्थगित केल्यानंतर जिल्ह्यात 8 डेपोच्या एसटी डेपोतून एसटी बस वाहतूक सुरुळीत सुरु झाली मात्र अलिबाग, मुरुड, श्रीवर्धन, कर्जत आणि माणगाव या पाच डेपोतील संघटना आपल्या भूमिकाांवर ठाम असल्याने संप कायम होता. विभागीय नियंत्रक अनघा बारटक्के यांनी आवाहन करीत मनधरणी केल्यानंतर शुक्रवारी कर्जत, श्रीवर्धन आणि माणगाव तर शनिवारी अलिबाग आणि मुरुड डेपोतील संघटनांनी आपले आंदोलन स्थगित केले. त्यामुळे दोन दिवसानंतर शनिवारी दुपारपासून जिल्ह्यात लाल परी पुन्हा रस्त्यावर धावू लागली.
एसटी कर्मचार्यांचे शासनात विलिनीकरण करावे या प्रमुख मागणीसह अनेक प्रलंबित मागण्यांसाठी एसटी कर्मचारी संघटनांनी पुकारलेल्या काम बंद आंदोलन सुरु झाल्यानंतर जिल्ह्यातील सर्व एसटी आगारातील कर्मचारी संघटना यात सहभागी झाल्या होत्या. त्याचा परिणाम एसटी प्रवासी सेवेवर मोठया प्रमाणावर झाला. शासनाने सकारात्मक प्रतिसाद देत बर्याचशा मागण्या मान्य केल्यानंतर जनतेच्या गैरसोयीचा विचार करीत कर्मचारी कृती समितीने आपले आंदोलन स्थगित करीत पुन्हा सेवा सुरु केली. मात्र भाजपा आमदार गोपिचंद पडळकर यांनी केलेल्या आवाहनानुसार काही डेपोतील कर्मचारी संघटनांनी आपले आंदोलन सुरुच ठेवण्याचा निर्णय घेतला होता. यात अलिबाग, मुरुड, श्रीवर्धन, कर्जत आणि माणगाव या रायगड जिल्ह्यातील आठ डेपोतील कर्मचारी संघटनाचा देखील समावेश होता. त्यामुळे रायगडातील एसटी सेवा पुर्णपणे सुरु झाली नव्हती. विभागीय नियंत्रक अनघा बारटक्के यांनी प्रत्यक्ष संपर्क साधत संप मागे घेऊन कामावर रुजू होण्याचे आवाहन केल्यानंतर संघटनांशी झालेल्या सकारात्मक चर्चेअंती शुक्रवारी कर्जत, माणगाव आणि श्रीवर्धन डेपोतील कर्मचारी संघटनांनी बंद मागे घेतला. तर अलिबाग आणि मुरुड डेपोतील संघटना आंदोलनावर ठाम होत्या. मात्र शनिवारी झालेल्या यशस्वी चर्चेनंतर आणि ऐन दिवाळीच्या तोंडावर प्रवाशांची गैरसोय होऊ नये या भावनेतून मुरुड आणि अलिबाग डेपातील संघटनांनी देखील आपले आंदोलन स्थगित केले. त्यामुळे दुपारी 2 नंतर सर्वच आगारातील एसटी सेवा पुर्ववत सुरु झाल्या.
या संपामुळे रायगड जिल्ह्यातील दिवसाचे 30 लाख या प्रमाणे अडीच दिवसांचे 75 लाखांचे उत्पन्न बुडाले. दुपारनंतर लांब पल्ल्याच्या फेर्या देखील सुरळीत सुरु.
अनघा बारटक्के , विभागीय नियंत्रक
बंद स्थगित पण धग कायम
शासनाच्या आवाहनाला प्रतिसाद देत एसटी कर्मचारी कृती समितीने आपले आंदोलन स्थगित केले असले तरी सर्व मागण्या मान्य होईपर्यंत आंदोलन मागे घेतले जाणार नसून विधीमंडळाच्या हिवाळी अधिवेशनादरम्यान कृती समितीच्या वतीने मोर्चा काढण्यात येणार असल्याचे जिल्हा अध्यक्ष विलास खोपडे यांनी सांगितले.