अंबाती रायुडूचे वक्तव्य
। अहमदाबाद । वृत्तसंस्था ।
एलिमिनेटरमध्ये पराभव झाल्यानंतर चेन्नई सुपर किंग्जचा माजी खेळाडू अंबाती रायुडूने मोठे वक्तव्य केले आहे. त्यामुळे मोठी खळबळ उडाली आहे. अंबाती रायुडूने कोणत्याही खेळाडूचे नाव घेतले नाही मात्र, आक्रमकता आणि सेलिब्रेशनने ट्रॉफी जिंकता येत नाही, असे म्हटले. बंगळूरूने चेन्नई सुपर किंग्जला लीग स्टेजमध्ये पराभूत करत प्लेऑफमध्ये प्रवेश केला होता. बंगळूरूने सलग सहावा विजय मिळवला होता. बंगळूरूला प्लेऑफमध्ये प्रवेश करण्यासाठी चेन्नईला 18 पेक्षा जास्त धावांनी पराभूत करण्याची गरज होती. बंगळूरूने चेन्नईवर 27 धावांनी विजय मिळवला होता. आरसीबीच्या विजयासह चेन्नईचे आव्हान संपुष्टात आले होते. चेन्नईला पराभूत केल्यानंतर विराट कोहली आणि बंगळुरुच्या खेळाडूंनी जोरदार सेलिब्रेशन केले होते. विराट कोहलीने सर्वात जास्त सेलिब्रेशन केले होते. विराट कोहलीने त्यावेळी आक्रमकपणे विजयाचा जल्लोष करत होता.
बंगळूरूचा एलिमिनेटरमध्ये राजस्थान रॉयल्सने पराभव केल्यानंतर अंबाती रायुडूने म्हटले की, आयपीएल ट्रॉफी सेलिब्रेशन आणि आक्रमकतेने मिळत नाही. फक्त चेन्नई सुपर किंग्जला पराभूत करुन आयपीएल ट्रॉफी मिळत नाही. आयपीएल ट्रॉफी जिंकण्यासाठी प्लेऑफमध्ये चांगली कामगिरी करण्याची गरज असते, असे अंबाती रायुडू म्हणाला.