थर्टी फस्टसाठी सारे सज्ज
माथेरानमध्ये पर्यटकांची मांदियाळी
। माथेरान । वार्ताहर ।
पर्यटकांचे आवडते प्रदूषणमुक्त,गारेगार,अल्हाददायक पर्यटनस्थळ असलेल्या माथेरानमध्ये नाताळ व नववर्षाच्या स्वागतासाठी येथे आज पासून पर्यटकांची मांदियाळी पहावयास मिळणार आहे. कोरोना काळानंतर पहिल्यांदाच मोठ्या प्रमाणात पर्यटक माथेरानमध्ये दाखल झाले आहेत. मुंबई-पुण्यापासून हाकेच्या अंतरावर असल्याने लाखो पर्यटक माथेरानला भेट देतात. कोरोना काळात माथेरान एकदम सुन्न होते. कोरोना नंतर माथेरान पर्यटकांसाठी खुले करण्यात आले तेव्हापासून खूप कमी प्रमाणात पर्यटक येत होते.
मात्र यावर्षी दिवाळी आणि नाताळच्या सुट्ट्यांमध्ये पर्यटकांची संख्या वाढली आहे. यावर्षीच्या नववर्षाच्या स्वागतासाठी शुक्रवारपासून अनेक हॉटेल्स व लॉजमध्ये पर्यटकांनी रूम बुक केले आहेत. पर्यटकाना प्रवासात कोणताही त्रास होऊ नये यासाठी मिनिट्रेन सेवे बरोबरच नव्याने सुरू झालेली ई-रिक्षासेवा देखील सुरळीत सुरू आहे. नेहमी वाहनतळावर पार्किंग व्यवस्था गंभीर असयाची मात्र यावेळेला वन विभागामार्फत नियोजनबद्ध काम केल्याने येणार्‍या पर्यटकांना वाहनतळात कोणताही समस्या भेदासावताना दिसणार नाही.येणार्‍या पर्यटकांच्या सेवेसाठी व्यावसायिक सुद्धा आपली दुकाने सज्ज करून तयार आहे.
आल्हाददायक वातावरण
यावेळेला पाच महिने पाऊस पडल्यामुळे वातावरण अगदी आल्हाददायक झाले आहे.डिसेंबर महिन्याच्या शेवटच्या आठवड्यापासून माथेरानमध्ये गुलाबी थंडी जाणवू लागली.हळूहळू तापमनात घट होताना जाणवत आहे.त्यामुळे येथे या शेवटच्या आठवड्यात आलेल्या पर्यटकांना गुलाबी थंडीचा आनंद घेता येणार आहे.
नववर्षाच्या स्वागतासाठी आम्ही येथे आलो आहोत.त्यात शनिवार असल्याने मुंबई पासून माथेरान जवळ असल्याने चार दिवसांच्या सहलीसाठी माथेरानमध्ये परिवारासोबत आलो.इथल्या आल्हाददायक वातावरणामुळे आम्ही भारावून गेलो. प्रदूषणमुक्त वातावरणात फिरताना शहरीभागाचा विसर पडला. एका वेगळ्या दुनियेत आल्यासारखा भास होत आहे. नविन वर्षाचा सूर्योदय आम्ही येथे पाहणार आहोत. – राजेश मेन्युअल, पर्यटक, नवी मुंबई
