। नेरळ । वार्ताहर ।
नेरळ येथील कोतवालवाडी ट्रस्टमध्ये गेली दहा वर्षे महिला सक्षमीकरण काम करीत असून, हरिभाऊ भडसावळे महिला विकास केंद्र यांनी आतापर्यंत तब्बल 3000 महिलांना रोजंदारी दिला आहे. दरम्यान, कोतवालवाडी ट्रस्टकडून आता तीन विविध कोर्सेसची घोषणा करण्यात आली असून, त्या सर्व कोर्सेसमध्ये दहावीपर्यंत शिक्षण झालेल्या महिलांनी सहभागी होण्याचे आवाहन कोतवाल वाडी ट्रस्टच्या विश्वस्त संध्या देवस्थळे यांनी केले आहे.
स्वातंत्र्यसैनिक हरिभाऊ भडसावळे यांनी 1947 मध्ये कोतवाल ट्रस्टची स्थापना केली आणि तेव्हापासून त्या ठिकाणी महिला सक्षमीकरण, हातमाग केंद्र तसेच विद्यार्थी वसतिगृह चालविले जात आहे. येथील हरिभाऊ भडसावळे महिला विकास केंद्र यांच्या माध्यमातून विविध कोर्सेस चालविले जात आहेत. त्यात गेली 2012 पासून महिला सक्षमीकरण साठी लार्सन व ट्युब्रो पब्लिक चॅरिटेबल ट्रस्ट यांच्या मदतीने शिवणकला, नर्सिंगचे कोर्सेस चालविले जात आहेत. त्यात आता पर्यंत तब्बल 3000 महिलांनी कोर्सेस पूर्ण केले आहेत. त्यातील अनेक महिलांनी शिवणकला नंतर आपले व्यवसाय सुरु केले आहेत, तर नर्सिंगमधील जीडीए एल 4 आणि जीडीए हे कोर्स यशस्वीपणे पूर्ण करून नोकर्या मिळविल्या आहेत. तर कोतवाल वाडी मध्ये चालविल्या जात असलेल्या महिला रुग्णसेविका कोर्स पूर्ण करणार्या 740 महिलांना स्वावलंबी करण्यात यश आले आहे.