आणखी एक मुंबईकर आयपीएल खेळणार

। नवी दिल्ली । वृत्तसंस्था ।

आयपीएलचा लिलाव 24 व 25 नोव्हेंबरला सौदी अरेबियातील जेदाह येथे रंगणार आहे. या लिलावासाठी याआधी 574 खेळाडूंची यादी तयार करण्यात आली होती. आता या यादीमध्ये तीन खेळाडूंची भर पडली आहे. इंग्लंडचा वेगवान गोलंदाज जोफ्रा आर्चर, मुख्य मुंबईचा असलेला पण सध्या अमेरिकन संघामधून खेळत असलेला सौरभ नेत्रावळकर आणि मुंबईचा हार्दिक तामोरे यांचाही या यादीत समावेश करण्यात आला आहे. त्यामुळे आता ही यादी 577 खेळाडूंची झाली आहे.

मुंबई इंडियन्सने 2022 मध्ये जोफ्रा आर्चरला आठ कोटींची बोली लावून आपल्या संघात घेतले होते, पण दुखापतीमुळे तो त्या मोसमात खेळू शकला नाही. त्यानंतर 2023 मध्ये त्याने पाच सामन्यांमध्ये मुंबई इंडियन्सचे प्रतिनिधित्व केले. त्यानंतर इंग्लंड व वेल्स क्रिकेट मंडळाने त्याला आयपीएल लिलावापासून दूर ठेवले. जेणेकरून तो दुखापतीमधून बरा होईल व इंग्लंडसाठी पुन्हा खेळू शकेल. यंदाच्या लिलावातील खेळाडूंच्या यादीतही त्याचा समावेश नव्हता, पण बीसीसीआय व इंग्लंड, वेल्स क्रिकेट मंडळामध्ये याबाबत चर्चा झाली. त्यानंतर इंग्लंड, वेल्स क्रिकेट मंडळाकडून त्याला लिलावासाठी परवानगी देण्यात आली. त्यामुळे यंदाच्या लिलावात त्याचा समावेश करण्यात आला आहे.

आर्चरच्या नावाचा समावेश आयपीएल लिलावाच्या यादीत केला नसता, तर त्याला 2027 पर्यंत आयपीएलमध्ये सहभागी होता आले नसते. बीसीसीआयकडून आयपीएलसाठी नियम तयार करण्यात आले आहेत. त्यानुसार ज्या खेळाडूने याआधी आयपीएलमध्ये सहभाग दाखवला आहे, पण लिलावाच्या यादीत त्याचे नाव समाविष्ट नाही अशा खेळाडूंना पुढील मिनी लिलावात सहभागी होता येणार नाही. याचमुळे जोफ्रा आर्चरला 2027 पर्यंत आयपीएलपासून दूरच रहावे लागले असते, तसेच ज्या खेळाडूला एखाद्या संघाने बोली लावून आपल्या संघात घेतल्यास, त्यानंतर कोणतेही कारण न देता त्या खेळाडूने आपले नाव काढून घेतल्यास बीसीसीआयकडून त्या खेळाडूवर दोन वर्षांची बंदी लावण्यात येते. मुंबईकरांना संधी लिलावासाठी दोन नव्याने समाविष्ट करण्यात आलेल्या खेळाडूंमध्ये दोन मुंबईकरांचा समावेश आहे.

सौरभ नेत्रावळकर व हार्दिक तामोरे ही त्यांची नावे. सौरभ नेत्रावळकर सध्या जरी अमेरिकन संघामधून खेळत असला तरी तो मूळचा मुंबईकर आहे. नोकरीनिमित्त तो अमेरिकेत वास्तव्याला आहे. टी-20 विश्‍वकरंडकात त्याने शानदार कामगिरी करून सर्वांचे लक्ष वेधले होते. हार्दिक तामोरे हा मुंबईच्या मुख्य संघातील खेळाडू आहे. त्यामुळे लिलावात या दोन खेळाडूंना कोणते संघ आपल्या संघात घेताहेत, हे पाहणे रंजक ठरणार आहे.