कन्यादान योजनेचा लाभ घेण्याचे आवाहन

| अलिबाग । वार्ताहर ।
एकात्मिक आदिवासी विकास प्रकल्प पेण अंतर्गत रायगड, रत्नागिरी व सिंधुदूर्ग जिल्ह्यातील अनुसूचित जमातीच्या सामूहिक विवाह सोहळ्यात सहभागी होणार्‍या दांपत्याकरिता तसेच स्थानिक स्वराज्य संस्था व नामांकित स्वयंसेवी संस्थाकडून कन्यादान योजनेसाठी अर्ज मागवण्यात येत आहेत.

या योजनेचा लाभ घेणार्‍या दाम्पत्याने योग्य त्या कागदपत्रासह विहित नमुन्यात अर्ज सादर करावेत. सामूहिक विवाह सोहळ्यात सहभागी जोडप्यांना रु.10 हजार इतके अनुदान देय आहे. तसेच लग्न सोहळा आयोजित करण्यासाठी सेवाभावी संस्था तयार असल्यास कार्यक्रम आयोजन करण्यासाठी रु.10 हजार इतके अनुदान देय आहे.या योजनेचा लाभ घेण्यासाठी अर्जदारांनी-विहित नमुन्यातील कन्यादान योजनेचा अर्ज, दोन पासपोर्ट साईज फोटो, रहिवाशी दाखला, जातीचे दाखले, वयाबाबतचा शासकीय वैद्यकीय अधिकार्‍याचे प्रमाणपत्र/शाळा सोडल्याचा दाखला, विवाह न झाल्याबाबतचे प्रतिज्ञापत्र रु. 100 च्या स्टॅम्पवर नमूद करावे. लाभार्थ्यांना विहित नमुन्यातील अर्ज प्रकल्प अधिकारी, एकात्मिक आदिवासी विकास प्रकल्प, पेण जि.रायगड या कार्यालयातील कन्यादान योजना कक्षाकडून उपलब्ध करून दिले जाणार आहेत.

कन्यादान योजनेचा लाभ जास्तीत जास्त अनुसूचित जमातीच्या लाभार्थ्यांनी घ्यावा व या योजनेकरिता अर्ज सादर करावेत, असे आवाहन प्रकल्प अधिकारी, एकात्मिक आदिवासी विकास प्रकल्प, पेण शशिकला अहिरराव यांनी केले आहे.