नळपाणी योजना बारगळली; मुदतवाढ देऊनही काम अद्याप अपूर्णावस्थेत
| नेरळ | प्रतिनिधी |
कर्जत तालुक्यातील ओलमण या आदिवासीबहुल गावातील नळपाणी योजना ठेकेदाराच्या मनमानीमुळे रखडली आहे. जलजीवन मिशनमधील या योजनेच्या कामाचे कार्यादेश जून 2021 मध्ये देण्यात आले होते आणि मुदत संपून गेली तरी योजनेचे जेमतेम काम पूर्ण झाले, त्या बदल्यात 30 टक्के बिल अदा करण्यात आले आहे. दरम्यान, लघुपाटबंधारे विभाग यांनी या कामाबद्दल जिल्हा परिषद लघुपाटबंधारे विभगाचे कार्यकारी अभियंता यांना हस्तक्षेप करण्याची मागणी केली आहे, तर ठेकेदाराला अनेकदा नोटिसा देऊनदेखील काम पुढे जात नसल्याने ओलमण ग्रामस्थांच्या डोक्यावरील हंडा हातात येण्याची चिन्हे नाहीत.
तालुक्यातील ओलमण गावात अनेक वर्षे पिण्याच्या पाण्याची समस्या आहे. ती समस्या दूर करण्यासाठी जलजीवन मिशनमधून नळपाणी योजना मंजूर करण्यात आली होती. या नळपाणी योजनेचे कामासाठी 67 लाख 42 हजारांचा निधी मंजूर होता. तेथील सावतपाडा भागातील लघुपाटबंधारे विभागाच्या विहिरीवर उद्भव आणि तेथून चढावावर असलेल्या ओलमण गावात पाणी नेऊन घरोघरी पाणी देण्याची योजना बनविण्यात आली होती. या योजनेचे कामाचे कार्यादेश जून 2021 पर्यंत देण्यात आले होते. यावर्षी या योजनेचे काम पूर्ण करण्याची मुदतदेखील संपली आहे. मात्र, योजनेचे काम संथगतीने सुरू असल्याने रायगड जिल्हा परिषदेच्या लघुपाटबंधारे विभागाकडून डिसेंबर 2023 पर्यंत मुदतवाढ देण्यात आली आहे. मात्र, मुदतवाढ देऊन पाच महिन्यांचा कालावधी लोटला तरी ओलमण नळपाणी योजनेचे काम पुढे जाताना दिसत नाही. या नळपाणी योजनेतील जलवाहिन्यांशिवाय अन्य कोणतेही काम ठेकेदाराने केले नाही. त्यामुळे नळपाणी योजनेचे काम रखडले असून, ठेकेदाराला संबंधित विभागाकडून अनेक नोटिसा देण्यात आल्या आहेत. मात्र, ठेकेदाराने त्या सर्व नोटिसांना केराची टोपली दाखवली असून, या ठेकेदाराने मनमानी करीत ओलमण नळपाणी योजनेचे काम पूर्णपणे थांबवून ठेवले आहे.
या नळपाणी योजनेसाठी आणण्यात आलेल्या जलवाहिन्या या टाकण्यासाठी रस्त्याच्या कडेने खोदकाम केले आहे. पावसाळा सुरू होण्याआधी खोदलेल्या खड्ड्यात जलवाहिन्यादेखील टाकण्यात आलेल्या नाहीत. तर अन्य कोणतेही कामे ठेकेदाराने केली नाहीत. त्यामुळे संबंधित ठेकेदारावर कारवाई करावी, अशी मागणी स्थानिक ग्रामस्थ करीत आहेत. ग्रामस्थांच्या मागणीनंतर जिल्हा परिषदेचे कर्जत उपविभागीय उपअभियंता यांनी ओलमण येथे जाऊन पाहणी केली. मात्र, ठेकेदाराची मनमानी जिल्हा परिषद प्रशासन आणि जनतेसमोर पुन्हा आली असून, ठेकेदाराच्या मनमानीमुळे ओलमण नळपाणी योजना रखडल्याचे दिसून आले.
संबंधित कामाचे ठेकेदार आमच्या सूचना आणि नोटीस यांना कोणतेही उत्तर देत नाही आणि त्या नोटीसनुसार कार्यवाहीदेखील करीत नाहीत. त्यामुळे आम्ही आता रायगड जिल्हा परिषदेचे लघु पाटबंधारे विभागाचे कार्यकारी अभियंता संजय वेंगुर्लेकर यांना पत्र देणार असून, संबंधित ठेकेदाराला आपल्या माध्यमातून सूचना देण्यात याव्यात आणि ही योजना मार्गी लागावे यासाठी विनंती करणार आहोत.
अनिल मेटकरी, शाखा अभियंता