गावठी कट्टे, काडतूस विक्री करणारा जेरबंद

। अलिबाग । विशेष प्रतिनिधी ।
बेकायदेशीररित्या गावठी कट्टे तसेच जिवंत काडतूस विक्री करणार्‍यास स्थानिक गुन्हे अन्वेषण शाखा अलिबाग-रायगड यांनी केले जेरबंद केले आहे. या आरोपीकडून 51 हजार शंभर रुपयांचा ऐवज जप्त करण्यात आला असल्याची माहिती अपर पोलीस अधीक्षक अतुल झेंडे यांनी पत्रकार परिषदेत दिली.

दांडफाटा ते रसायनी जाणारे रोडवर अवैधरित्या एक व्यक्ती गावठी कट्टा-बंदूक विक्रीकरिता बंद जुन्या टोलनाक्याजवळ येणार असल्याची माहिती स्थानिक गुन्हे अन्वेषण शाखेकडील पोलीस हवालदार राजेश पाटील यांना मिळाली. त्यानंतर पोलीस अधीक्षक अशोक दुधे, अपर पोलीस अधीक्षक अतुल झेंडे यांच्या मार्गदर्शनाखाली स्थानिक गुन्हे अन्वेषण शाखेचे पोलीस निरीक्षक दयानंद गावडे यांच्या नेतृत्वाखाली छापा टाकण्यासाठी स्थानिक गुन्हे अन्वेषण शाखेचे पोसई महेश कदम, स्थानिक गुन्हे अन्वेषण शाखेकडील पोलीस अंमलदार यांचे पथक तयार करण्यात आले होते.

गुन्हे अन्वेषण शाखेच्या पथकाने दांडफाटा ते रसायनी जाणारे रोडवर बंद जुन्या टोलनाक्याजवळ सापळा रचून इब्राहीम मोहंम्मद उमर शेख (रा. मुंबई) यास ताब्यात घेऊन चौकशी केली असता त्याच्याकडे दोन गावठी कट्टे तसेच दोन जिवंत काडतूस जप्त करण्यात आले. आरोपीकडून 25 हजार रुपये किमतीचे दोन गावठी कट्टे, तसेच एक हजार रुपये किमतीचे दोन जिवंत काडतूस असा मिळून 51 हजार रुपयांचा मुद्देमाल जप्त केला. याप्रकरणी रसायनी पोलीस ठाण्यात गुन्हा दाखल करण्यात आला आहे.