मेट्रोच्या गोदामात चोरी करणार्‍यांना अटक

। पुणे । प्रतिनिधी ।

मेट्रोच्या गोदामातून सहा लाख 28 हजारांचे साहित्य चोरून पसार झालेल्या चोरट्यांना पोलिसांनी अटक केली आहे. ही घटना खडकी परिसरात घडली असून पोलीस अधिक तपास करीत आहेत.

मिळालेल्या माहितीनुसार, खडकी मेट्रो स्थानक परिसरात मेट्रोचे गोदाम आहे. गोदामात मेट्रोने वेगवेगळ्या प्रकारचे साहित्य ठेवले होते. आरोपींनी मेट्रोच्या गोदामाचे कुलूप तोडून सहा लाख 28 हजार रुपयांचे साहित्य चोरले. दोघे जण पुन्हा साहित्य चोरण्यासाठी गोदामाच्या परिसरात आले. तेव्हा सुरक्षारक्षकांनी दोघांना पकडून पोलिसांच्या ताब्यात दिले. वरुण भुपेंद्र नायडू (22) आणि सैबन्ना बसवराज पुजारी (23) अशी अटक करण्यात आलेल्या आरोपींची नावे आहेत. तसेच, याप्रकरणी पोलीस उपनिरीक्षक प्रवीण चौगले अधिक तपास करीत आहेत.

यापूर्वीही मेट्रोचे साहित्य चोरून नेण्याच्या घटना घडल्या आहेत. शिवाजीनगर, चतु:शृंगी पोलीस ठाण्यात चोरट्यांविरुद्ध गुन्हे दाखल झाले आहेत. शिवाजीनगर भागातील कामगार पुतळा परिसरात मेट्रोचा लोखंडी खांब चोरून पसार झालेल्या चोरट्यांना नुकतीच अटक करण्यात आली होती. तर गणेशखिंड रस्ता परिसरातही मेट्रोचे साहित्य चोरणार्‍या चोरट्यांना अटक करण्यात आली होती.