बाळाराम पाटील यांच्या प्रचाराला वेग

। पनवेल । प्रतिनिधी ।

पनवेल विधानसभा महाविकास आघाडी आणि शेकापचे उमेदवार बाळाराम पाटील यांच्या प्रचाराने आता चांगलाच जोर धरला आहे. महाविकास आघाडीचे पदाधिकारी व कार्यकर्ते घरोघरी जाऊन शिट्टी या चिन्हासमोरील बटण दाबून बाळाराम पाटील यांना प्रचंड बहुमताने विजयी करा, असे आवाहन करत आहेत.

पनवेल शहर आणि तालुका, खांदा वसाहत, कळंबोली, कामोठे, नवीन पनवेल, खारघर, तळोजा आदी भागातील महाविकास आघाडीचे पदाधिकारी हे बाळाराम पाटील यांना विजयी करण्यासाठी रस्त्यावर उतरले आहेत. त्यांच्या प्रचाराला चांगला प्रतिसाद मिळत आहे. पनवेल विधानसभा शेकापचे उमेदवार बाळाराम पाटील यांच्या शिट्टी या चिन्हासमोरील बटण दाबून प्रचंड मतांनी विजयी करा, अशा स्वरुपाच्या पत्रकांचे वाटप सुरू आहे. या प्रचारात तरुणवर्गसुद्धा मोठ्या हिरीहिरीने भाग घेत आहेत. महाविकास आघाडीचे सर्व पदाधिकारी आता प्रचारात एकरुप होऊन उतरले असून शिट्टीचा आवाज प्रत्येक शहरात, गल्लीत, विभागात घुमू लागला आहे. यामुळे मा.आ. बाळाराम पाटील यांनी प्रचारात घेतलेल्या आघाडीमुळे विरोधकांना चांगलीच धडकी बसली आहे.

महाविकास आघाडीचे उमेदवार बाळाराम पाटील यांच्या प्रचारार्थ खा. निलेश लंके यांची जाहीर सभा 14 नोव्हेंबर रोजी सायंकाळी 5 वाजता कामोठे सेक्टर-36 येथे आयोजित करण्यात आली आहे. या सभेला उपस्थित राहण्याचे आवाहन करण्यात आले आहे.