निवडणूक प्रक्रिया थांबल्याने इच्छुकांमध्ये नाराजी
| आगरदांडा | प्रतिनिधी |
तीन कोटींची वार्षिक उलाढाल असणारा मुरुड तालुक्यातील नामंकित मुरुड तालुका सुपारी खरेदी-विक्री संघाची निवडणूक लांबणीवर गेल्याने उत्सुक उमेदवारांचा हिरमोड झाला आहे. आज 1 डिसेंबर रोजी अर्ज मागे घेण्याचा शेवटचा दिवस होता. त्यामुळे कोण उमेदवार आपला अर्ज मागे घेणार याची मोठी उत्सुकता होती. निवडणुकीची सर्व प्रक्रिया पूर्ण झाली असताना शासनाने नवीन अध्यदेशाद्वारे अ व ब वर्गातील संस्थांच्या निवडणूक पुढे ढकल्याण्याचा निर्णय घेतला आहे. सदरील निवडणुकांना 20 डिसेबरपर्यंत स्थगिती देण्यात आल्याची माहिती सहकारी संस्थांचे ए.आर. प्रशांत पाटील यांनी पत्रकारांना दिली आहे. त्यामुळे निवडणुकीची सर्व प्रक्रिया पूर्ण झाली असतानादेखील शासनाच्या स्थगिती आदेशामुळे या निवडणूक पुढे ढकलण्यात आल्या आहेत.
संपन्न होणार्या या निवडणुकीत सुपारी खरेदी विक्री संघाचे 1306 सभासद असून, ते आपल्या मतदानाचा अधिकार बजावणार होते. सहकारी तत्वावर स्थापन झालेला हा सुपारी संघामुळे स्थानिक लोकांनासुद्धा मोठा रोजगार प्राप्त झाला आहे. मुरुड तालुक्यातील सुपारीचे पीक घेणार्या बागायतदारांना चांगला भाव मिळवून देण्याचे काम सुपारी संघातर्फे होत असते. दर पाच वर्षांनी या संघाची सार्वत्रिक निवडणूक होत असते. 17 संचालक विविध भागातून निवडून दिले जात असतात. निवडून आलेल्यामधून चेरमनपदाची निवड होत असते.
या सुपारी संघाची निवडणूक 10 डिसेंबर रोजी संपन्न होणार होती. आतापर्यंत या निवडणुकीसाठी 40 जणांचे अर्ज सहाय्यक निंबंधक श्रीकांत पाटील यांच्याकडे जमा झाले होते. या अर्जांची छाननी प्रक्रिया संपन्नसुद्धा झाली होती. 40 अर्ज वैध ठरले होते.
या निवडणुकीत उत्सुक उमेदवार आपापले स्वतंत्र पॅनल काढून ही निवडणूक लढवत असतात. या निवडणुकीत ज्यांची बागायत जमीन आहे त्यांनाच मतदान हक्क असतो.
दोन्ही पॅनलकडून अर्ज दाखल करण्यात आले असून, सर्वांनी निवडणुकीची जोरदार तयारी सुरु केली होती. सुपारी संघावर संचालक म्हणून जाण्यास प्रत्येक जण उत्सुक होता.परंतु, आता निवडणूक पुढे ढकल्यामुळे सर्वांची नाराजी झाली आहे.