सावधान! ‘या’ भागात बिबट्याचा वावर
नागरिकांमध्ये भीतीचे वातावरण
| खरोशी | वार्ताहर |
केळवणे गावात गुरुवारी रात्री आठच्या सुमारास वाघेश्वर भागात लोकवस्तीत रहदारीच्या ठिकाणी बिबट्याचे दर्शन झाले. त्यामुळे परिसरातील गावांमध्ये घबराटीचे वातावरण पसरले आहे. भरलोकवस्तीत बिबट्या दिसल्याने नागरिक भयभीत झाले आहेत. वनविभागाकडून खबरदारीचे आवाहन करण्यात येत असून, शोधमोहीम सुरू आहे.
केळवणे गावाची वाघेश्वर टेकडी ही चिरनेरच्या जंगलाचा पूर्वार्ध भाग आहे. म्हणजेच केळवण्याच्या या टेकडीपासूनच चिरनेरचे जंगल सुरु होते. चिरनेरच्या जंगलात हिंस श्वापदांचा पूर्वापार वावर आहे. सध्या जंगलतोड आणि उत्खनन यामुळे अनेक जंगली श्वापद आपले ठिकाण सोडून सैरभैर झाले आहेत. अशातच कधी कधी रस्ता चुकून ते लोकवस्तीत दिसून येतात. गेल्या दहा-बारा दिवसांपूर्वी अशीच बिबट्याची पावलं दिघाटी साईदरम्यान लोकांना दिसून आली होती. परंतु, आता तर बिबट्याला केळवणे गावातील ग्रामस्थांनी आपल्या घराजवळ बघितले आहे, त्यामुळे लोकांमध्ये घबराटीचे वातावरण पसरले आहे.
केळवणे वाघेश्वर टेकडी हे पन्नास ते साठ घरांचे 300 च्या आसपास लोकवस्ती असलेले ठिकाण आहे. तेथे गुरुवारी रात्री आठच्या दरम्यान एक दहा-बारा वर्षाचा मुलगा दुकानावर गेला असताना त्याला दोन घरांच्या मधल्या गल्लीत बिबट्या दिसला. त्याने आरडाओरडा केल्यावर बाजूच्या घरातील विनोद घरत या युवकाने आजूबाजूच्या लोकांना सतर्क केले. परंतु, लोक जमल्यानंतर बिबट्याने तिथून पळ काढला. त्यानंतर ग्रामस्थांनी परिसरात शोध घेतला असता, तो आढळला नाही. वनविभाकडून शोधमोहीम सुरू असून, अद्याप बिबट्याचा थांगपत्ता लागलेला नाही. तरी, नागरिकांनी खबरदारी बाळगावी, असे आवाहन त्यांच्याकडून करण्यात येत आहे.
On 7th June 1937, Krushival was started as a weekly magazine and the masses got their platform. In the Raigad district, many new movements were launched to fight against injustice and exploitation upon the underprivileged and the hard-working common people.