मोठी बातमी: आरोपी कुटुंबासह फरार

| मुंबई | प्रतिनिधी |

घाटकोपर होर्डिंग दुर्घटनेतील आरोपी भावेश भिंडे कुटूंबासह फरार झाल्याची माहिती समोर आली आहे. भावेश भिंडे मुलूंड पश्चिमेला आशिष टॅावरमध्ये रहायला होता. भावेश भिंडे याचा पोलिसांकडून शोध सुरू आहे.

मुंबईतील घाटकोपर येथे द्रुतगती मार्गावरील पंतनगर येथे असलेल्या पेट्रोल पंपावर (दि.13) वादळी वाऱ्यामुळे मोठा जाहिरातीचा फलक कोसळून भीषण दुर्घटना घडली. या प्रकरणात भावेश भिंडे आरोपी असून त्याच्यावर सदोष मनुष्यवधाचा गुन्हा दाखल करण्यात आला आहे. पेट्रोल पंपावर 120 बाय 120 आकाराचा मोठा होर्डिंग कोसळला. दुर्घटनेत 14 निष्पाप लोकांनी आपला जीव गमावला आहे. या प्रकरणात आरोपी भावेश भिंडे सह इतर काही जणांवर गुन्हा दाखल करण्यात आला आहे. पंतनगर पोलिसांकडून भावेश भिंडेचा शोध सुरु असून तो सध्या कुटुंबासह फरार असल्याचे समोर आले आहे.

भावेश भिंडे हा इगो मीडियाचा संचालक आहे. याच मीडिया कंपनीचे हे होर्डिंग होते. 2009 मध्ये भावेश भिंडेने अपक्ष निवडणूक लढवली होती. त्याने निवडणूक आयोगाला दिलेल्या शपथपत्रात त्याच्यावर 26 गुन्हे दाखल असल्याचे नमूद करण्यात आले आहे. विनापरवाना साईन बोर्ड लावल्याप्रकरणी भावेश भिंडेवर हे गुन्हे दाखल केल्याची माहिती आहे.